У.Сямашка: беларускія НПЗ можна прадаць замежнікам

Вэнэсуэльскія кампаніі могуць стаць акцыянэрамі беларускіх нафтаперапрацоўчых заводаў, заявіў журналістам першы намесьнік прэм'ер-міністра Беларусі Уладзімір Сямашка.

Сямашка нагадаў, што ў статутным фондзе ААТ "Мазырскі нафтаперапрацоўчы завод" 41,6% складае доля расійскага боку, а ў статутным фондзе ААТ "Нафтан" увесь пакет акцый належыць Беларусі.

"Мы ніколі не хавалі, што шукаем інвэстараў на гэтыя прадпрыемствы", — цытуе спадара Сямашку БелаПАН.

Паводле Сямашкі, патэнцыяльны інвэстар павінен не толькі мець рэсурсы, каб купіць пакет акцый, але і прапанаваць адразу інвэстыцыйную праграму "гадоў на дзесяць наперад". Акрамя таго, ён павінен мець "унутраныя рэсурсы, каб забясьпечыць загрузку прадпрыемстваў". Трэцяе патрабаваньне: патэнцыяльныя акцыянэры павінны мець рынкі збыту.

У залежнасьці ад таго, якія ўмовы прапаноўвае інвэстар, яму можа быць перададзены любы пакет акцый аж да кантрольнага, адзначыў першы віцэ-прэм'ер.

Разам з тым, паводле слоў Сямашкі, Беларусь з асьцярогай падыходзіць да выбару інвэстараў — у краіне "не так і шмат" нафтаперапрацоўчых прадпрыемстваў.