Лінкі ўнівэрсальнага доступу

Пафала пра шлях Беларусі да Эўропы

абноўлена

Рональд Пафала
Рональд Пафала
Кіраўнік ведамства канцлера ФРГ, фэдэральны міністар па спэцыяльных даручэньнях Рональд Пафала адказаў на пытаньні журналістаў. Пафала ўдзельнічае ў працы міжнароднага Менскага форуму.


Беларускія ўлады павінны растлумачыць сытуацыю са сьмерцю журналіста Алега Бябеніна

"На XIII Менскім форуме я казаў пра сьмерць Алега Бябеніна. Я вельмі выразна сказаў, што мы чакаем высьвятленьня ня высьветленых дагэтуль падзеяў, якія прывялі да яго сьмерці", — сказаў Пафала.

Улады Беларусі "павінны зрабіць усё для таго, каб высьветліць акалічнасьці гэтай справы", — адзначыў Пафала.

Заснавальнік сайту "Хартыя-97" Алег Бябенін быў знойдзены ў пятлі на сваім лецішчы 3 верасьня. Людзі, якія бачылі цела Бябеніна, кажуць пра падазроны вывіх нагі, драпіны і плямы на руках і целе нябожчыка. Аднак у заключэньні афіцыйнай экспэртызы сказана, што сьлядоў зьнешняга ўзьдзеяньня не было.

25—29 кастрычніка Менск наведалі экспэрты-крыміналісты АБСЭ, якія дасьледавалі матэрыялы праверкі па факце сьмерці Бябеніна.


Пафала: Сьмяротнае пакараньне — самая сур'ёзная перашкода на шляху Беларусі ў Эўропу

"Самая сур'ёзная перашкода шчыльнейшаму супрацоўніцтву Беларусі з Эўропай — гэта выкарыстаньне сьмяротнага пакараньня", — заявіў кіраўнік ведамства канцлера ФРГ, фэдэральны міністар па асаблівых даручэньнях Рональд Пафала.

"Сьмяротнае пакараньне для нас непрымальнае. А ў Беларусі сьмяротнае пакараньне ня толькі існуе ў Крымінальным кодэксе, але і прыводзіцца ў выкананьне", — дадаў ён.

Беларусь засталася адзінай краінай у Эўропе, дзе ўжываецца сьмяротнае пакараньне.

29 красавіка 2010 году Парлямэнцкая асамблея Рады Эўропы прыпыніла кантакты зь Беларусьсю ў сувязі зь "недастатковым прагрэсам" краіны ў справе адпаведнасьці стандартам Рады Эўропы.

Паводле праваабаронцаў, ад часу абвяшчэньня краінай незалежнасьці ў 1991 годзе сьмяротных прысудаў было вынесена больш за 400.


Беларусь, як і раней, далёкая ад свабодных выбараў

Нягледзячы на пэўны прагрэс, у Беларусі, як і раней, ня створаны ўмовы для свабодных і празрыстых выбараў, заявіў Пафала.

"Нармальных умоваў для свабодных выбараў тут няма. Беларусь, як і раней, далёкая ад свабодных выбараў", — заявіў Пафала.

Ён, праўда, дадаў, што "тыя абмежаваньні, якія існавалі раней, да прыкладу, пры зборы подпісаў, не існуюць".

"Параўноўваць са стандартамі свабодных выбараў у эўрапейскіх краінах немагчыма. За некалькі тыдняў да выбараў выбарцы яшчэ ня ведаюць, хто кандыдат", — адзначыў нямецкі палітык.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG