Лінкі ўнівэрсальнага доступу

Міліцыянты абшукалі кватэру Яўгена Афнагеля


Яўген Афнагель

Яўген Афнагель

Супрацоўнікі міліцыі Першамайскага раёну Менску ўчынілі ператрус на кватэры Яўгена Афнагеля, кіраўніка менскага штабу патэнцыйнага кандыдата на прэзыдэнта Андрэя Саньнікава.

Старэйшы лейтэнант міліцыі Жарскі паведаміў, што ператрус праводзіцца ў зьвяку з распачатай крымінальнай справай, па якой Яўген Афнагель і ягоная жонка Паліна Кур'яновіч праходзяць сьведкамі. Міліцыянты шукалі рацыю, якую нібыта Кур'яновіч скрала ў спэцназаўца міліцыі падчас вулічнай акцыі 16 жніўня ў Менску.

Рацыю ў кватэры не знайшлі. Міліцыянты склалі пратакол ператрусу і сышлі.

27 кастрычніка на 16:00 Яўгена Афнагеля і Паліну Кур'яновіч выклікаюць на допыт у міліцыю.

Паводле Я.Афнагеля, падчас акцыі 16 жніўня, калі людзей пачалі зьбіваць і затрымліваць, у аднаго зь міліцыянтаў вывалілася рацыя.

"Паліна машынальна падабрала яе і аддала міліцыянту. Цяпер міліцыянты абвінавачваюць Паліну ў тым, што яна нібыта забрала сабе гэтую рацыю".

Я.Афнагель сказаў, што крымінальная справа была пачата яшчэ напрыканцы жніўня, а самыя актыўныя дзеяньні міліцыянтаў пачаліся менавіта ў самую адказную фазу перадвыбарчай кампаніі, падчас збору подпісаў:

"Таму я лічу, што гэта накіравана на зрыў збору подпісаў. Я спрабаваў дамовіцца са сьледчым, каб перанесьці допыт на панядзелак, калі скончыцца збор подпісаў. Але ён сказаў, што на яго цісьне начальства, каб нас выклікаць на допыт да пятніцы".

Паказаць камэнтары

XS
SM
MD
LG