Лінкі ўнівэрсальнага доступу

Бліц-агляд падзеяў і тэмаў у Беларусі, сьвеце, гісторыі.


ПАХМУРНА...


...а надвячоркам пакрапае. Тэмпэратура ўдзень: 3 – 8 °С.

НЕ ПРАХОДЗЬЦЕ МІМА:


Сустрэча з польскай пісьменьніцай Вольгай Такарчук і прэзэнтацыя беларускага перакладу яе раману “Правек ды іншыя часы”. У вечарыне прымаюць удзел: перакладчыца Марына Шода, заслужаная артыстка Беларусі Зоя Белахвосьцік, этна-джаз-гурт “Акана-NHS”. Вядзе вечарыну паэт Андрэй Хадановіч. Дзяржаўны музэй гісторыі беларускай літаратуры (вул. М. Багдановіча, 13), пачатак а 17.30.

ТАМ, ДЗЕ НАС НЯМА:


Прэзыдэнт Нямеччыны Хрыстыян Вульф у Расеі.

Губэрнатар Каліфорніі Арнольд Шварцэнэгер таксама ў Расеі.

У Бадэн-Бадэне працягваецца тыдзень Нямецка-расейскага дыялёгу.

У Бухарэсьце канфэрэнцыя на тэму эўрапейскай дапамогі ў інтэграцыі цыганоў.

ТАКСАМА Ў ГЭТЫ ДЗЕНЬ:


У 1492 Хрыстафор Калюмб адкрыў Амэрыку. Праўда, гэта была яшчэ ня ўся Амэрыка, а толькі востраў Сан-Сальвадор на Багамах. І сам Калюмб лічыў, што прыплыў у Індыю. Тым ня менш для Амэрыкі настала новая эра.

У 1865 нарадзіўся Міхаіл Анцаў, беларускі кампазытар і харавы дырыжор (пам. 1925).

У 1924 памёр францускі пісьменьнік Анатоль Франс (нар. 1844), ляўрэат Нобэлеўскай прэміі 1921.

У 1925 у Бэрліне пачалася Другая ўсебеларуская канфэрэнцыя. Беларускія палітыкі, якія паверылі, што ў БССР можна рэалізоўваць ідэалы нацыянальнага адраджэньня, пераконвалі сваіх калег-эмігрантаў “скласьці зброю” і спыніць барацьбу з бальшавікамі. На той Бэрлінскай канфэрэнцыі паўнамоцтвы ўраду БНР нібыта былі перададзеныя ўраду БССР. Аднак старшыня Рады БНР Пётра Крачэўскі і ягоны намесьнік Васіль Захарка гэтага рашэньня не прызналі. Як паказала гісторыя, слушна зрабілі. Бо нацыянальнае адраджэньне ў савецкім Менску хутка зьмянілася жорсткай русіфікацыяй і патанула ў крыві масавых сталінскіх рэпрэсіяў.

У 1960 савецкі лідэр Мікіта Хрушчоў зьняў чаравік і грукаў ім па трыбуне ААН падчас свайго выступу на паседжаньні Генэральнай Асамблеі, на якім Філіпіны абвінавацілі СССР у вядзеньні каляніяльнай палітыкі ва Ўсходняй Эўропе.

МІНУС 365:


Год таму на сайце “Свабоды”: "Беларусы родную мову любяць. Засталося толькі на ёй загаварыць".

ЦЫТАТА НА ПАМЯЦЬ:


"Мы ня ведаем, што зрабіць з гэтым кароткім жыцьцём, але хочам іншага, якое трывала б вечна".

Анатоль Франс
XS
SM
MD
LG