Лінкі ўнівэрсальнага доступу

Слухачы абмяркоўваюць адстаўку мэра Масквы Юрыя Лужкова і прэзыдэнцкую выбарчую кампанію ў Беларусі, выказваюць свае патрабаваньні да кандыдатаў на прэзыдэнта.


Слухачы выказваюцца наконт адстаўкі мэра Масквы Юрыя Лужкова. Ці можа гэта адстаўка азначаць, што Расея стала на шлях дэмакратычных пераўтварэньняў? Наш слухач зь Менску выказаўся наступным чынам:

«Нарэшце далі па кепцы багачу непатапляльнаму мэру Масквы Юрыю Лужкову. Выдатна было б, калі б прэзыдэнт Мядзьведзеў вызваліў з астрогу Хадаркоўскага і Лебядзева, а туды накіраваў Лужкова і яго ненасытную жонку Батурыну».

Званок слухача камэнтуе навуковец Лявон Баршчэўскі:

Лявон Баршчэўскі
«Расейская сыстэма ўлады — гэта такая сыстэма, дзе двум мядзьведзям у адной бярлозе няма месца. Калі такі пэрыяд здараецца, то ён вельмі кароткі. Напрыканцы 90-х і напачатку 2000-х Лужкоў быў патрэбны, бо ён меў падтрымку дастаткова вялікай алігархічна-намэнклятурнай партыі „Айчына — уся Расея“. Тады яны дамовіліся пра мір з групай Пуціна.

Цяпер Лужкоў не патрэбны, і яго адпраўляюць у адстаўку, таму што гэты клан хоча кіраваць усім самастойна.

Ці пасадзяць яго і жонку ў турму? Я сумняваюся, таму што гэта наўрад ці камусьці выгадна. Думаю, што іх пакінуць у спакоі. Папросту Лужкоў сёньня ня мае той палітычнай вагі. За ім няма таго палітычнага руху і капіталу, які быў тады.

Я ня ведаю, ці выпусьцяць Хадаркоўскага. Магчыма, але пра яго ўсе забыліся. Сядзіць, і чаму б яму не сядзець далей?».


Слухачы абмяркоўваюць фільм АНТ, стваральнікі якога нэгатыўна выказваліся пра Ўладзімера Някляева і кампанію «Гавары праўду». Вось выказваньне аднаго са слухачоў:

«Перадвыбарчая гонка ў нас яшчэ не пачалася, а на БТ ужо ўсхваляюць правадыра. А што да Ўладзімера Някляева, які яшчэ нават і не кандыдат у прэзыдэнты, то яго ўжо пачалі абліваць брудам.

Адразу відаць, што для існуючай у нас хунты ён найбольш небясьпечны. Хочацца сказаць таварышам з БТ: «Ну, калі вы ўжо такія аб’ектыўныя, калі ў нас сапраўды дэмакратыя, то трэба даць слова і Ўладзімеру Някляеву. Няма ніякага сумневу, што й у яго ёсьць, што сказаць.

Вядома, Някляеву можна было б падаць у суд на БТ, але, пры нашай сытуацыі гэта немагчыма. Таму заўсёды падчас выбараў ідзе такая ганебная гульня ў адны вароты».

Званок слухача камэнтуе прэсавая сакратарка Ўладзімера Някляева Юлія Дранчук:

«Тое, што гэты фільм паказалі пасьля вельмі маленькай разьбежкі па часе пасьля рэгістрацыі кандыдатаў, мы гэта ўспрынялі так, што сёньняшні ўрад нас прызначыў самым галоўным злом. Адпаведна мы з гонарам лічым, што яны нас лічаць самым галоўным канкурэнтам.

У любым выпадку, нарэшце, дачакаліся згадак пра кампанію „Гавары праўду“ ў такім шырокім фармаце. Улічваючы аўдыторыю беларускага тэлеканалу, будзем лічыць, што рэкляма ёсьць рэклямай».


Слухач сталага ўзросту выказаўся, за каго ён будзе галасаваць:

«Я буду галасаваць за таго кандыдата на прэзыдэнта, які паабяцае вярнуць людзям грошы, якіх пазбавілі ў 1992 годзе».


Заўтра 30 верасьня Нілу Гілевічу споўніцца 79 гадоў. Слухач «Свабоды» віншуе паэта:

«Цудоўная мова, самабытны беларускі народ паспрыялі таму, што Ніл Сымонавіч адбыўся як сапраўдны паэт сваёй Бацькаўшчыны. На маю думку, з усіх сучасьнікаў ніхто так горача не бароніць родную мову як Вы, паважаны Ніл Сымонавіч».

Тэлефон «Свабоды» ў Менску — 266-39-52, працуе 24 гадзіны на суткі. Тэлефануйце! Дзяліцеся навінамі, выказвайце сваё стаўленьне да падзеяў у Беларусі і ў сьвеце. Мы таксама чакаем водгукаў на працу Радыё Свабода.


Паказаць камэнтары

XS
SM
MD
LG