Лінкі ўнівэрсальнага доступу

Сёньняшняя эканамічная сытуацыя ў Беларусі істотна розьніцца ад той, што прывяла да 20%-ай дэвальвацыі на пачатку 2009 году, патлумачыла "Свабодзе" ачольніца пастаяннай місіі Міжнароднага валютнага фонду ў Беларусі Натальля Калядзіна.

У адрозьненьне ад 2008 году, калі беларускі рубель падвяргаўся стрэсу, зьвязаным са скачкамі курсу даляра, на сёньняшні дзень, беларускі валютны рэжым – значна больш гнуткі. Курс рубля прывязаны да кошыка валют, які складаецца з даляра ЗША, эўра і расейскага рубля. Яшчэ большы прастор для манэўру ўлады маюць дзякуючы ўсталяванаму "калідору" ў плюс-мінус 10%, у рамках якога Нацыянальны банк можа дазволіць павышэньне ці паніжэньне курсу нацыянальнай валюты.

Акрамя таго, істотна палепшылася сытуацыя са зьнешнім гандлем. Гандлёвы дэфіцыт скарачаецца, прынамсі, на гэты момант. Адпаведна і ціск на рубель – слабейшы, чым два гады таму.

Што да зьніжэньня працэнтнай стаўкі і падвышэньня заробкаў, гэта абгаворвалася з урадам яшчэ ў часе дзеяньня праграмы МВФ, зьвязанай з крэдытам стэнд-бай. Іншая справа, што тыя кансультацыі не прадугледжвалі настолькі імклівых крокаў у гэтым кірунку.

Але нават пры сёньняшняй эканамічнай палітыцы ўраду, асьцярогі аб тым, што найбліжэйшым часам яна выльецца ў гіпэрінфляцыю – могуць быць істотна перабольшанымі. Прадстаўніца МВФ зазначыла, што з-за скарачэньня вытворчасьці ў краіне ў часе крызысу, у беларускай эканоміцы назапасіўся істотны незадзейнічаны патэнцыял. Таму дадатковыя грошы, што запускаюцца ў эканоміку, спрыяюць павелічэньню эканамічнай актыўнасьці і росту валавага прадукту, а ня проста выліваюцца ва ўздым цэнаў.

Спадарыня Калядзіна дадала, што беларуская фінансавая сыстэма знаходзіцца ў працэсе разьвіцьця. З паглыбленьнем фінансавай сыстэмы разьвіваюцца крэдытныя дачыненьні і расьце патрэба ў банкаўскім фінансаваньні з боку суб'ектаў гаспадараньня. Гэта, на яе думку, яшчэ адна прычына таго, што значнае павелічэньне грашовай базы не прывяло да істотнага павелічэньня інфляцыі.

Паказаць камэнтары

XS
SM
MD
LG