Лінкі ўнівэрсальнага доступу

logo-print

Барак Абама: "Частка нашай свабоды – у тым, каб бараніць свабоду іншых"


Барак Абама прамаўляе на сэсіі Генэральнай Асамблеі ААН

Барак Абама прамаўляе на сэсіі Генэральнай Асамблеі ААН

Прэзыдэнт ЗША Барак Абама назваў замежнапалітычныя прыярытэты сваёй адміністрацыі, падкрэсьліўшы ролю Злучаных Штатаў у адстойваньні правоў чалавека, справядлівасьці і дэмакратыі, каб гарантаваць глябальную бясьпеку і эканамічную стабільнасьць.

Выступаючы ў чацьвер на паседжаньні Генэральнай асамблеі ААН, Абама закрануў галоўныя праблемы, зь якімі сутыкнуліся Злучаныя Штаты і сьвет, і падаў прынцыпы замежнай палітыкі, якімі будзе кіравацца Вашынгтон:

“Ідэя тут простая – свабода, справядлівасьць і мір для сьвету павінны пачынацца з свабоды, справядлівасьці і міру ў жыцьці кожнага канкрэтнага чалавека. Для Злучаных Штатаў гэта пытаньне маральнай і практычнай неабходнасьці”.
Свабода, справядлівасьць і мір для сьвету павінны пачынацца з свабоды, справядлівасьці і міру ў жыцьці кожнага канкрэтнага чалавека

Абамавы словы на паседжаньні Генэральнай асамблеі ААН сталі працягам сказанага амэрыканскім прэзыдэнтам у сераду на аанаўскім саміце, прысьвечаным мэтам тысячагодзьдзя. Абама тады, у прыватнасьці, заявіў, што Вашынгтон ня будзе надалей ацэньваць сваіх скіраваных на разьвіцьцё ў розных рэгіёнах сьвету высілкаў сумамі патрачаных даляраў або колькасьцю дастаўленых прадуктаў і мэдыкамэнтаў. Паводле амэрыканскага прэзыдэнта, Вашынгтон будзе шукаць партнэраў, якія самі хочуць нарошчваць свой патэнцыял, каб дапамагчы сваім народам.

Дасюль, знаходзячыся на пасадзе прэзыдэнта, Абама настолькі моцна не падкрэсьліваў важнасьці правоў чалавека і дэмакратыі як ключавога пункту замежнай палітыкі ЗША. Наадварот, амэрыканскі прэзыдэнт зьвяртаў большую ўвагу на рэалізацыю “агульных інтарэсаў” народаў як на спосаб дасягненьня мэтаў Злучаных Штатаў у сфэры эканомікі і нацыянальнай бясьпекі.

Цяпер назіральнікі канстатуюць зьмену. З апошніх Абамавых словаў вынікае, што Вашынгтон будзе надаваць асаблівае значэньне намаганьням, якія спрыяюць эканамічным і палітычным рэформам у іншых краінах.
Мы бачым, як бясконца адкладаюцца дэмакратычныя рэформы

“Сёньня, як і ў мінулую пару эканамічнага спаду, некаторыя адстаўляюць правы чалавека ўбок у імя пэрспэктывы кароткатэрміновай стабільнасьці або памылковага ўяўленьня, што эканамічны рост можа надысьці за кошт свабоды. Мы бачым лідэраў, якія адменьваюць тэрміны паўнамоцтваў, перасьледуюць грамадзянскую супольнасьць, бачым карупцыю, што душыць прадпрымальніцтва і робіць немагчымым належнае кіраваньне. Мы бачым, як бясконца адкладаюцца дэмакратычныя рэформы”, – сказаў Абама.

З трыбуны ААН амэрыканскі прэзыдэнт заклікаў актыўна падтрымаць ЗША у змаганьні за правы чалавека і дэмакратыю тыя краіны, што ў апошнія дзесяцігодзьдзі вызваліліся ад таталітарных рэжымаў:
Не маўчэце, калі дзе ў сьвеце кідаюць у турмы іншадумцаў і зьбіваюць удзельнікаў пратэстаў, бо частка нашай свабоды якраз у тым, каб бараніць свабоду іншых

“Сьвет, да якога імкнецца Амэрыка, нам не пабудаваць самім. Для таго, каб правы чалавека затрыюмфавалі там, дзе пануе цяпер прыгнёт, нам патрэбна вашая адкрытая падтрымка. У прыватнасьці, я зьвяртаюся да тых краінаў, што вызваліліся ад тыраніі і сваім прыкладам натхнялі сьвет у другой палове мінулага стагодзьдзя – ад Паўднёвай Афрыкі да Паўднёвай Азіі, ад Усходняй Эўропы да Паўднёвай Амэрыкі. Не маўчэце, калі дзе ў сьвеце кідаюць у турмы іншадумцаў і зьбіваюць удзельнікаў пратэстаў, бо частка нашай свабоды якраз у тым, каб бараніць свабоду іншых”.

На думку Абамы, найважнейшае, што можа зрабіць улада для сваіх грамадзянаў – гэта забясьпечыць дэмакратыю, якая раней або пазьней прывядзе да росквіту. “Дэмакратыя пераможа ў сьвеце не таму, што Злучаныя Штаты навязваюць яе, а таму, што грамадзяне розных краінаў будуць патрабаваць, каб іх думку ўлічвалі ў кіраваньні дзяржаваю”, – падкрэсьліў амэрыканскі прэзыдэнт.

Паказаць камэнтары

XS
SM
MD
LG