Ганаровы консул Чачэнскай Рэспублікі Ічкерыі ў Польшчы Адам Бароўскі заяўляў напярэдадні, што Ахмед Закаеў ня мае намеру хавацца на польскай тэрыторыі і а 8-й гадзіне раніцы ў пятніцу добраахвотна зьявіцца ў варшаўскім акруговую пракуратуру для таго, каб высьветліць, за што яго хочуць затрымаць.
“Ахмед Закаеў лічыць Польшчу сяброўскай краінаю, ён шмат разоў наведваў Польшчу, у яго тут шмат сяброў, таму Закаеў ня хоча, каб яго арыштавалі як злачынцу”, – адзначыў Бароўскі.
Аднак дарогаю ў пракуратуру Закаева затрымалі – пра гэта паведаміў дэпутат Эўрапарлямэнту Тадэвуш Зьвефка, які быў разам з чачэнскім палітыкам.
У пятніцу Ахмед Закаеў меў намер узяць удзел у Сусьветным чачэнскім кангрэсе, які праходзіць пад Варшаваю. Напярэдадні расейскі бок запатрабаваў затрыманьня і экстрадыцыі Закаева – Масква вінаваціць яго ў тэрарызьме.
Прэм'ер-міністар Польшчы Дональд Туск заявіў, што Польшча ня мае іншага выйсьця – раз Інтэрпол вышуквае Закаева, то яго мусяць затрымаць аўтаматычна.
“Аднак запэўніваю вас, што экстрадыцыйная працэдура не абавязкова завяршаецца выдачаю. Расейскі бок ня можа разьлічваць, што яе патрабаваньні будуць задаволеныя”, – падкрэсьліў Туск.
Сам Закаеў перад уваходам у будынак пракуратуры пасьпеў сказаць, што спадзяецца на справядлівы разгляд ягонай правы:
"Я ў любым выпадку не чакаю таго, што будуць парушаныя прынцыпы дэмакратыі і вяршэнства закону. Польшча – гэта вольная і дэмакратычная краіна, і калі я даведаўся, што ёсьць такая праблема, я вырашыў прыйсьці".
Паводле заканадаўства, цяпер пракуратура павінна апытаць Закаева, а потым накіраваць справу ў суд.
«Мы пакуль што пачалі знаёміцца з дакумэнтамі. Што будзем далей рабіць, сказаць не магу, пакуль ня скончым азнаямленьня з паперамі», – сказала прэсавая сакратарка пракуратуры Моніка Левандоўска.
