Лінкі ўнівэрсальнага доступу

Пэдагог, грамадзкая актывістка, намесьніца старшыні Таварыства беларускай школы. Нарадзілася 31 ліпеня 1964 году на Лепельшчыне. Скончыла Беларускі дзяржаўны ўнівэрсытэт і асьпірантуру пры ім. З 1986 па 2003 год працавала у Акадэміі Навук у Інстытуце электронікі. У 2003 годзе перавялася ў Беларускі гуманітарны ліцэй імя Я. Коласа, дзе працавала мэтадыстам, выкладчыкам фізыкі. З 1999 году – каардынатарка праграмы “Настаўнік. Школа. Грамадзтва”. Займаецца мэтадычнай і грамадзянскай адукацыяй настаўнікаў. Рэдактар сайту Nastaunik.info. Жыве ў Менску.


Што для вас свабода?

Найвялікшая каштоўнасьць. Іншыя каштоўнасьці: здароў’е, грошы, дэмакратыя… – гэта толькі складнікі свабоды.


Што найбольш абмяжоўвае вашу свабоду?


Вонкавую – шмат што. Унутраную – толькі я сама.


Што для вас шчасьце?

Калі я пачынаю думаць: “пара мне пахудзець!” – гэта значыць, няма большай бяды


Чаго вы найбольш баіцеся?


Думаць пра тое, чаго баюся. Становіцца страшна жыць.


Які талент вы хацелі б мець?

Талент зарабіць шмат грошай і быць мэцэнатам – я ведаю, якую ідэю я б падтрымала.


Кім з сучасьнікаў вы захапляецеся?


Моладзьдзю. Дзеці эпохі Адраджэньня – пакаленьне сёньняшніх 20-гадовых – нашмат лепшыя за нас: у іх былі іншыя стартавыя ўмовы, лепшая адукацыя, яны вырасьлі накормленымі, таму здольныя думаць пра большае, у іх менш савецкіх комплексаў. Спадзяюся, яны скажуць сваё слова ў нашай гісторыі. Яшчэ з сучасьнікаў вылучаю Пятра Садоўскага, Мікалая Запрудзкага, Валянціну Трыгубовіч, Лявона Баршчэўскага, Алу Орсу-Рамана, Валерыя Мазынскага. Мне пашчасьціла жыць у адзін час з гэтымі наймагутнейшымі асобамі – сапраўднымі Беларусамі. Захапляюся шматлікімі беларускімі настаўнікамі, якіх тут не пералічыць. Наогул, вакол мяне ходзіць процьма цікавых таленавітых людзей, дзеля якіх хочацца жыць і працаваць.


Што вы найбольш любіце рабіць?

Рабіць тое, ува што веру. І яшчэ зьбіраць грыбы.


Калі б можна было пражыць жыцьцё яшчэ раз, што б вы зьмянілі?


Вывучыла б некалькі замежных моваў, скончыла музычную школу, сказала б бацькам, што я імі ганаруся, запісала б песьні, якія сьпявала бабуля.


Якую найлепшую параду вы атрымалі?

Парад разумных было шмат. Каб я яшчэ да іх прыслухоўвалася!


Які ваш улюбёны дэвіз?


Рабі, што можаш, і будзь, як будзе….


У якой палітычнай сыстэме вы хацелі б жыць?


Адназначна, у дэмакратычнай.


У якой краіне вы хацелі б жыць?


Там, дзе нарадзілася і вырасла. Апошнім часам нават падарожнічаць не люблю.


У якую эпоху вы хацелі б жыць?


Ад цяпер і далей.


Калі б вы сталі кіраўніком Беларусі, што б зрабілі найперш?


Калі б абралі – прыйшлося б кіраваць. Найперш правяла б прыватызацыю (каб беларусы сталі багацейшымі і мелі што бараніць), увяла б самакіраваньне (каб людзі самі былі адказныя за сваё жыцьцё) і адразу б абвясьціла перавыбары. Не люблю хадзіць у грыбы разам з аховаю.


Якія адносіны Беларусь павінна мець з Эўразьвязам?


Увязацца.


Якія адносіны Беларусь павінна мець з Расеяй?

Як і з астатнімі суседзямі.


Некаторыя думаюць так: “Хай дыктатура, абы свая”. А Вы?


Я ня згодна зь некаторымі.


Калі і як у Беларусі зьменіцца ўлада?

Ведаць бы! Адно мне здаецца, халявы ня будзе. Прыйдзецца пазмагацца.


Калі беларусы загавораць па-беларуску?

Яны гаварылі і гавораць.


Што будзе, калі беларусы не загавораць па-беларуску?

У час інфармацыйнага грамадзтва цяжка зьнішчыць мову. Калі што – пахаваемся нейкі час у інтэрнэце, потым зноў дахаты.

XS
SM
MD
LG