Лінкі ўнівэрсальнага доступу

logo-print

У эфіры "Званкі на Свабоду". Большасьць тэлефанаваньняў слухачоў тычыцца прэзыдэнцкай выбарчай кампаніі. Ці будзе адзіны кандыдат ад дэмакратычных сіл? Каго падтрымаюць расейскія ўлады падчас выбараў? Шмат тэлефанаваньняў выклікаў крытычны званок слухача аб тым, што радыё надае шмат увагі паэтцы Ларысе Геніюш.


Слухачка Свабоды
абмяркоўвае сытуацыю, якая склалася ў краіне напярэдадні чарговай прэзыдэнцкай кампаніі, і выказвае сваю думку:

"Палітыкі гадаюць, ці ёсьць імавернасьць чарговага збліжэньня паміж Менскам і Брусэлем. А хіба было ўжо гэтае збліжэньне? Была хітрасьць, каб атрымаць крэдыты. Калі спэцпадразьдзяленьні прэзыдэнта робяць свае трэніроўкі зграяй на полі, дзе разьвесілі для іх шмат бел-чырвона-белых сьцягоў — так пабачыў выпадкова чалавек, які вам тэлефанаваў. Вось які цынізм! Ужо ідзе падрыхтоўка да новых прэзыдэнцкіх выбараў. Дзе тут збліжэньне з эўрапейскімі каштоўнасьцямі? Лукашызм — асаблівая і вельмі небясьпечная зьява ня толькі для Беларусі. А спадар Лукашэнка разумее, што перамагчы без Масквы яму будзе на выбарах цяжка. І разам з выбрыкамі да Крамля ён працягвае біць у самае сэрца беларушчыны. Толькі што ліквідаваныя яшчэ дзесяткі школ зь беларускай мовай навучаньня, больш зь вясковых пачатковых, дзе дзеткі найбольш убіралі ў сябе беларускае з маленства. Вельмі сьпешна ўводзяцца ўрокі праваслаўнай культуры ў школах. Можа і ацэняць гэта ў Крамлі — палітыку Мураўёва ў Беларусі ёсьць каму працягваць. Паважаная апазыцыя, ну знайдзіце ўсё ж у сабе сілы на адзінага кандыдата. На гэтым тыдні Мілінкевіч адказваў на Свабодзе на тэлефанаваньне пра заможнае жыцьцё ў Беларусі. Проста адказаў, ясна, лягічна, каротка. Наогул, у спадара Мілінкевіча матэматычны склад розуму. Гэта палітык, які добра разумее ўсю адказнасьць перад беларускім народам".

Гэтае тэлефанаваньне камэнтуе палітоляг Юры Чавусаў:

Юры Чавусаў
"Мэдыйнае асьвятленьне тых працэсаў, якія цяпер адбываюцца ў апазыцыі, скандальнае. Прэсе цікавыя скандалы, маўляў, апазыцыя ня можа аб'яднацца, ах, якая кепская апазыцыя.

Справа ў тым, што адзіны кандыдат — гэта ня ёсьць сьвятая карова. Гэта паліттэхналягічны элемэнт у ажыцьцяўленьні пэўных сцэнараў. На дадзены момант, калі ў апазыцыі няма адзінага падыходу да гэтых выбараў, то й няма адзінага сцэнару.

Пэўная частка апазыцыі бачыць пагрозу, што народнае абурэньне падчас гэтых выбараў можа быць інсьпіраванае і скарыстанае зьнешнімі сіламі дзеля таго, каб умацаваць у Беларусі яшчэ больш прарасейскі рэжым, яшчэ больш прарасейскага кандыдата. Менавіта з-за таго, што няма адзінага падыходу да гэтых выбараў, няма й адзінага кандыдата".

Шмат тэлефанаваньняў выклікаў зварот слухача, які папрасіў спыніць праграму "Жнівень з Ларысай Геніюш", матывуючы гэта тым, што слухачам гэта нібыта не цікава і паэтку ўсё роўна ніхто ня ведае.

"Мяне не зьдзівіла, што беларускі бухгальтар ня чула пра Ларысу Геніюш. Упэўнена, што гэтая бухгальтарка ня чула і пра Яўгена Еўтушэнку, а пра Фёдара Дастаеўскага і пагатоў. Гэтая самая бухгальтарка і прагаласавала за кандыдатуру на пост прэзыдэнта, які і сёньня, пасьля 16 гадоў кіраваньня дзяржавай, яшчэ не разабраўся, хто ж такі Францыск Скарына".

Наша слухачка ўважліва слухала перадачу "Як Ларыса Геніюш кулінарыла" і параўнала тагачасны эканамічны стан краіны зь цяперашнім.

"Паслухала я пра кулінарныя здольнасьці Ларысы Геніюш і некалькі рэцэптаў, прапанаваных ёй. Калі яна жыла ў Зэльве, яна магла гатаваць па гэтых рэцэптах. Калі б цяпер асабіста мне і многім нашым пэнсіянэрам давялося гатаваць па гэтых рэцэптах, траціны кампанэнтаў мы б не знайшлі у нашых крамах, а нават калі б знайшлі, то цэны — завоблачныя. Нашы пэнсіянэры харчуюцца дрэнна і няякасна, таму шмат хварэюць. Адразу пасьля вайны харчаваліся лепш, чым цяпер. Траска лічылася рыбай для бедных, у крамах яе было шмат. Рэцэпт быў вельмі просты: рыба па-грэцку. Цяпер гэта ўжо недаступна, гэта казка. Селядзец ісландзкі, хамса — гэта ўсё простыя прадукты. А сальцісон з самых простых прадуктаў. Можна пералічаць бясконца — цяпер гэта недасяжна. Выснова: разьвівайце індывідуальную сельскую гаспадарку. Насаджайце вёскі, каб людзі не імкнуліся ў гарады, тады бузе ўсім ежа — і гараджанам, і вяскоўцам".

Адзін наш слухач сталага веку зьвяртае ўвагу на тое, пра якіх дзеячаў культуры распавядаюць з экранаў беларускім гледачам.

"Гэта было ў Юрмале, у жніўні 1990 года. Гатэль “Юрмала”. Я сядзеў у холе, калі да мяне падсела парачка. Гэта быў Цой і дзяўчына, яны вельмі сварыліся. Пасьля Цой ускочыў, выбег на пляцоўку, сеў у ружовы "Масквіч" і газануў. Празь вялікае шкло ўсё было добра відаць. Дарога ў Юрмале вузенькая і пакручастая, дзесьці і занесла. Як сказаў бы Жыглоў, трэба своечасова разьбірацца са сваімі жанчынамі. Дык вось 15 жніўня па АНТ паказвалі канцэрт да 20-годзьдзя трагічнай сьмерці Цоя. Гэты карэйскі хлопчык сьпяваў па-расейску, сьпяваў нядрэнна, але не набыў сусьветнай вядомасьці. Далей АНТ зьбіраецца паказаць перадачу да 75-годзьдзя расейскага артыста Табакова, а 9 жніўня да стагодзьдзя нараджэньня мудрай і таленавітай беларускі Ларысы Геніюш АНТ нічога не паказаў, і мабыць, не пакажа".

Вы слухалі званкі на "Свабоду". Нагадаю, што тэлефон "Свабоды" ў Менску — 266-39-52, працуе 24 гадзіны на суткі. Тэлефануйце і пішыце! Дзяліцеся навінамі, выказвайце сваё стаўленьне да падзеяў у Беларусі і ў сьвеце. Мы таксама чакаем водгукаў на працу Радыё “Свабода”.
XS
SM
MD
LG