Лінкі ўнівэрсальнага доступу

Лукашэнку ў Ерэване за свайго прыняў толькі былы прэзыдэнт Армэніі


У сталіцы Армэніі завяршыўся двухдзённы нефармальны саміт Арганізацыі дамовы аб калектыўнай бясьпецы. Кіраўнікі шасьці краінаў СНД вырашылі, што да сьнежня трэба выпрацаваць прапановы на зьмену статутных дакумэнтаў з тым, каб пашырыць паўнамоцтвы АДКБ дзеля большага ўплыву на крызісныя сытуацыі ў межах краінаў-сябраў арганізацыі. За прыклад неэфэктыўнага ўзаемадзеяньня былі названыя падзеі ў Кіргізстане, якія пры староньнім бязьдзеяньні прывялі да шматлікіх чалавечых ахвяраў.

Сёньня вышэйшыя асобы працягнулі кантактаваньне на Севане -- буйнейшым прэснаводным возеры Каўказу.

У сьнежні старшынства ў АДКБ пяройдзе да Беларусі. Узначаліць арганізацыю Аляксандар Лукашэнка мусіў яшчэ год таму, аднак з-за тагачаснага беларуска-расейскага малочнага канфлікту ўчыніў дэмарш і на маскоўскі саміт не паехаў. На выніковай прэс-канфэрэнцыі расейскі лідэр Дзьмітрый Мядзьведзеў заявіў, што цяпер кіраўнік Беларусі выказаў гатоўнасьць прыняць такую місію. Фактычна гэта было адзінае публічнае згадваньне пра Беларусь, мяркуючы па чым, ня вельмі ўпісаўся Лукашэнка і ў фармат ерэванскай сустрэчы. Нават афіцыйныя беларускія СМІ ніводнага разу не працытавалі кіраўніка Беларусі, а праграмы навінаў абмежаваліся толькі выказваньнямі гаспадара мерапрыемства, прэзыдэнта Армэніі Сержа Саргсяна:

"Мы пацьвердзілі, што будзем прытрымлівацца абяцаньняў, дадзеных на нашай травеньскай сустрэчы, і дамовіліся працягваць кансультацыі па мерах стабілізацыі сытуацыі ў Кіргізстане. У больш агульным пляне мы гаварылі аб неабходнасьці фармаваньня эфэктыўных мэханізмаў крызіснага рэагаваньня ў АДКБ".

Аляксандар Лукашэнка прыбыў у Ерэван самы першы з запрошаных, аднак меў толькі кароткую сустрэчу ля трапу самалёту з Сержам Саргсянам, а наступныя два дні разам з сынамі Віктарам і Мікалаем правёў у кампаніі з экс-прэзыдэнтам Армэніі Робэртам Качаранам. Менавіта на яго асобныя аналітыкі ўскладалі місію міратворцы, якая, праўда, так і засталася гіпатэтычнай.

Прынамсі, пра двухбаковыя перамовы Лукашэнкі з калегамі нічога не паведамляецца, таму, праўдападобна, ніяк ня спраўдзіліся спадзяваньні на замірэньне зь Дзьмітрыем Мядзьведзевым. Зрэшты, некаторыя расейскія экспэрты наўпрост сьцьвярджалі, што ў Ерэване Лукашэнка мусіць зьмірыцца з ролю "ізгоя": той жа Мядзьведзеў наўпрост абвінаваціў беларускага лідэра ў непасьлядоўнасьці з абяцаньнем прызнаць Абхазію і Паўднёвую Асэтыю, а кіраўніца Кіргізстану Роза Атунбаева некалькі месяцаў дамагаецца ад Беларусі выдачы зрынутага Курманбека Бакіева.

Да таго ж, адразу пасьля заканчэньня ў чэрвені беларуска-расейскага газавага канфлікту расейскія СМІ распачалі масіраваную інфармацыйную атаку супраць Лукашэнкі, які "паразытуе на Расеі" і пры гэтым намагаецца яе ўвесь час падмануць. Тэлеканал НТВ нават асьмеліўся паставіць мэдычны дыягназ кіраўніку Беларусі, што ў адносінах паміж намінальнымі саюзьнікамі -- факт беспрэцэдэнты.

Аўтарка атылукашэнкаўскага сэрыялу "Эвангельле ад лукавага" у расейскай "Новой газете" Ірына Халіп кажа, што Лукашэнку зараз складана "адмыцца" ня толькі ў вачах палітычнай эліты, але і перад жыхарамі постсавецкіх краін, многія зь якіх дагэтуль на яго маліліся:

Ірына Халіп
"Я лічу, што з улікам палітычнай пэрспэктывы кампанія на выкрыцьцё сутнасьці Лукашэнкі будзе працягнутая. І няхай працягваюць казаць праўду! Няхай сапраўды ўмоўны дзядзька Сьцёпа з Тамбоўскай губэрні пачытае, паглядзіць не аднаго толькі "Хроснага Бацьку", а шмат чаго іншага. І тады, магчыма, ён штосьці зразумее. Ну а калі не, дык яму і ня трэба нічога спрабаваць тлумачыць".

Застаючыся ўдзельнікам шматлікіх арганізацый у межах СНД, афіцыйны Менск, тым ня менш, знаходзіць усё меней паразуменьня з партнэрамі. Так званая саюзная дзяржава Беларусі і Расеі пераўтвораная ў простую фармальнасьць, ставіцца пад сумнеў удзел у Мытным саюзе, няма асаблівых дывідэндаў ад Эўразійскай эканамічнай супольнасьці. Нічым сябе Беларусь пакуль не выяўляе і ў АДКБ.

Палітоляг Вячаслаў Оргіш кажа, што ў такой сытуацыі кіраўніцтву краіны нічога не застаецца, як увесь час шукаць новых саюзьнікаў:

Вячаслаў Оргіш
"Відавочна, што сёньня Беларусь мяняе свой вэктар. Ва ўсялякім разе, яна яго істотна карэктуе. Калі раней існаваў так бы мовіць дыхатамічны падзел – Усход-Захад – то сёньня, канечне, гэты дваісты падзел выводзіцца з абароту. А на яго месца заступае схема зьнешняй палітыкі, на самой справе заснаваная на шматвэктарнасьці. І ў гэтай шматвэктарнасьці, на мой погляд, вызначаюцца пэўныя прыярытэты. Адным зь іх ёсьць супрацоўніцтва з краінамі на захадзе і поўдні Эўропы".

Сёньня ўдзельнікі ерэванскага саміту АДКБ працягвалі нефармальнае кантактаваньне на прыродзе – на беразе возера Севан. Аднак журналісты да вышэйшых асобаў дапушчаныя не былі, таму магчымыя спробы Аляксандра Лукашэнкі палагодзіцца зь некаторымі калегамі засталіся за кадрам.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG