Лінкі ўнівэрсальнага доступу

Расея спыніла экспарт збожжа


У Расеі з 15 жніўня ўступіла ў сілу забарона на экспарт збожжа.

Паводле пастановы ўраду Расеі "Аб увядзеньні часовай забароны вывазу некаторых відаў сельскагаспадарчых тавараў з тэрыторыі Расейскай Фэдэрацыі" ад 5 жніўня 2010 году забарона будзе дзейнічаць да 31 сьнежня 2010 году. Пад яе падпадаюць пшаніца і мэсьлін, ячмень, жыта, кукуруза, пшанічная або пшанічна-жытнёвая мука.

Неабходнасьць такога кроку прэм'ер Расеі Ўладзімер Пуцін патлумачыў тым, што "нам трэба не дапусьціць росту ўнутраных цэнаў у Расеі, захаваць пагалоўе жывёлы і сфармаваць рэзэрвы будучага году".

Забарона носіць часовы характар, сытуацыя пасьля сьнежня будзе залежаць ад вынікаў уборачнай кампаніі.

Першай рэакцыяй на гэтае рашэньне быў рэзкі ўзьлёт сусьветных цэнаў.

У цяжкім становішчы могуць апынуцца Армэнія, Азэрбайджан, Грузія, якія закуплялі расейскае збожжа.

Міністар сельскай гаспадаркі і харчаваньня Беларусі Міхаіл Русы ня бачыць ніякіх праблемаў для краіны ў зьвязку з прынятым у Расеі рашэньнем аб прыпыненьні экспарту збожжа.

"Тут няма ніякіх праблемаў. Гэта ўнутраная справа дзяржаў. Яны, відаць, палічылі, як рацыянальна выкарыстаць наяўныя рэсурсы, паглядзелі балянс", — сказаў 9 жніўня ў інтэрвію "Інтэрфаксу" М.Русы.

Паводле міністра, у зьвязку з рашэньнем расейскага боку "ў нас не ўзьнікае ніякіх праблемаў з Расеяй і ў Расеі — з намі. Ня будзе і ў нас ніякіх праблемаў на ўнутраным рынку", — адзначыў М.Русы.

Паводле Нацыянальнага статкамітэту, у 2009 годзе Беларусь імпартавала з Расеі 5,6 тысячы тон пшаніцы на 1,3 мільёна даляраў і 1,1 тысячы тон ячменю на 125 тысяч даляраў.

Кіраўнік Беларусі Аляксандар Лукашэнка схіляецца да таго, што расейскі ўрад прыме рашэньне аднавіць экспарт збожжа раней за плянаваны тэрмін.

"Я б не прыпыняў экспарт, я б патроху грузіў збожжа. Але абсалютна правільнае рашэньне прыняў расейскі ўрад, бо перш за ўсё трэба забясьпечыць унутраны рынак. Але гэты рэзкі рух прывёў да ваганьняў цэнаў на збожжа".
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG