Лінкі ўнівэрсальнага доступу

Берасьцейцы адзначылі дзень атрыманьня Магдэбурскага права


Актывісты кампаніі «Гавары праўду» ўскладаюць кветкі да шыльды.

Актывісты кампаніі «Гавары праўду» ўскладаюць кветкі да шыльды.

Актывісты кампаніі «Гавары праўду» ўсклалі кветкі да памятнай шыльды ў гонар здабыцьця горадам права на самакіраваньне на рагу вуліц Савецкай і Маякоўскага.

Берасьце атрымала Магдэбурскае права 15 жніўня 1390 году, другім на абшарах ВКЛ пасьля Вільні.

Старшы навуковы супрацоўнік музэю «Выратаваных каштоўнасьцяў» Берасьця Сяргей Быцкевіч, даючы ацэнку гэтай гістарычнай падзеі, кажа:

«Атрыманьне Магдэбурскага права — даволі важная і адметная падзея ў гісторыі гораду. Праўда, пакуль гэты дзень не адзначаецца належным чынам. Але час павінен зьмяніць стаўленьне да гісторыі».

Паводле Магдэбурскага права ў Берасьці зьявілася свая рада, якая кіравала жыцьцём гораду, стваралася эканамічная незалежнасьць ад фэадалаў. На чале гораду стаяў войт, які падпарадкоўваўся толькі князю ВКЛ.

Нязьменным атрыбутам гораду з Магдэбурскім правам была ратуша. Сяргей Быцкевіч кажа, што, паводле гісторыкаў, берасьцейская ратуша стаяла на тэрыторыі цяперашняй крэпасьці, дзе раней месьціўся стары горад. Больш дакладна — за сучасным манумэнтам «Мужнасьць».

Быцкевіч: «Ратуша ў Берасьці была зьнішчана расейскай уладай пасьля падзелаў Рэчы Паспалітай, як і па тэрыторыі ўсё Беларусі. Такім чынам руйнавалася памяць, незалежнасьць, а таксама прыналежнасьць да эўрапейскай культуры».

XS
SM
MD
LG