Лінкі ўнівэрсальнага доступу

“Масква на выбарах ня кіне Лукашэнку выратавальнага кола”


"Foreign Policy" лічыць, што ў Лукашэнкі няма рэальна ўплывовых сяброў, “Голас Расіі” сьцьвярджае, што ”Лукашэнка баіцца думаць”, а “Камэрсант” знайшоў дыпляматычнага сьведку, які пацьвердзіў, што Лукашэнка публічна пакляўся вырашыць пытаньне аб прызнаньні Паўднёвай Асэтыі і Абхазіі.

Міжнародная прэса працягвае аналізаваць ахалоджваньне адносінаў паміж Менскам і Масквой, даючы свае вэрсіі прычынаў іх узаемнай незадаволенасьці.

“У Аляксандра Лукашэнкі няма сяброў (зь ліку тых, хто важныя)”, – піша ў амэрыканскім часопісе "Foreign Policy" Йен Брэмэр і нагадвае: “Прыкладна праз шэсьць месяцаў у Беларусі адбудуцца выбары, а адзіны каштоўны саюзьнік Лукашэнкі Масква наўрад ці кіне яму выратавальнае кола”.
Расейскім уладам Лукашэнка надакучыў таму, што яны лічаць яго няўдзячны нахлебнікам

На самой справе, расейскім уладам Лукашэнка надакучыў таму, што яны лічаць яго няўдзячны нахлебнікам, – сьцьвярджае "Foreign Policy”. – Беларускі прэзыдэнт набірае палітычныя ачкі ў сябе ў краіне, выступаючы з крытыкай на адрас Масквы. Беларусь дала прытулак зрынутаму кіргіскаму лідэру Бакіеву – яшчэ аднаму самаўладнаму прэзыдэнту, які настроіў супраць сябе суседнюю Расею. Лукашэнка ў якасьці ўмовы для стварэньня Мытнага саюзу з Расіяй і Казахстанам патрабуе паставак таннай расейскай нафты і газу.

Лукашэнка цалкам правільна задаецца пытаньнем аб тым, наколькі доўга яму ўдасца захаваць сваю папулярнасьць, калі будуць скарочаныя датацыі на куплю паліва спажыўцамі, калі будуць замарожаныя заробкі, спынены рост пэнсій і дзяржаўныя асыгнаваньні на абарону занятасьці.

У Масквы больш за ўсіх магчымасьцяў для таго, каб прымусіць Лукашэнку сур'ёзна пахвалявацца. Кантракты паміж Расеяй і Беларусьсю на пастаўку і транзыт энэргарэсурсаў павінны быць перазаключаныя да канца году, – нагадвае амэрыканскі часопіс. – Цалкам верагодна, што з-за іх узьнікне бойка, а Беларусь сутыкнецца з новымі перабоямі ў пастаўках і нашкодзіць гандлёвым адносінам у іншых абласьцях. Гэта можа выклікаць хаос і замяшаньне ва ўсёй беларускай эканоміцы – і адбудзецца гэта пасярод зімы і пасярод перадвыбарчай кампаніі.

Калі Расея сапраўды захоча пакараць беларускага прэзыдэнта, яна можа адмовіцца прызнаваць вынікі выбараў. На такія крайнія меры Масква наўрад ці пойдзе. Але Беларусь цалкам можа стаць чарговай постсавецкай дзяржавай, якую ў наступныя месяцы чакаюць небясьпечныя хваляваньні, – заключае Йен Брэмэр з "Foreign Policy".

”Лукашэнка баіцца думаць”, – пад такой назвай выйшаў рэпартаж на радыёстанцыі «Голас Расіі».

Аляксандр Лукашэнка адкрыта прызнаўся ў тым, што беларусам ня «сьвеціць» эўрапейскае жыцьцё і адначасна раскрыў сваім суайчыньнікам рэальны ўзровень заробкаў, на якія яны маглі б разьлічваць, калі б краіна выбрала рынак замест мутаванай мадэлі савецкай разьмеркавальнай сыстэмы, устаноўленай дзеючым прэзыдэнтам краіны, – расказвае «Голас Расіі».

«Калі народ хоча атрымліваць паўтары-дзьве тысячы даляраў заробку, давайце дамо. Мы можам зрабіць як у Эўропе, але тады будзеце, як і ў іх, плаціць поўны кошт. Проста вы гэтага не жадаеце. Я баюся думаць, як вас у гэтае жыцьцё акунуцць», – заявіў Аляксандр Лукашэнка.
Першынства ў пошуку мяжы рэсурсу цярпеньня ў эксплёатацыі саюзьніцкіх адносін належыць беларускаму лідэру

Сакрэты любога ілюзіяніста заснаваныя выключна на законах фізыкі і няўважлівасьці гледачоў, якія стараліся не заўважаць, што да некаторага часу пасьпяховасьць эканомікі Беларусі грунтавалася толькі на экспартных прэфэрэнцыях, створаных Расеяй часам на шкоду сваім уласным вытворцам, на нафтагазавых «кропельніцах» і прамым допінгу ў выглядзе фінансавых ін'екцый. На думку некаторых экспэртаў, агульны кошт расейскай эканамічнай дапамогі Беларусі, складае каля 50 млрд даляраў, – так апісвае «Голас Расіі» цяперашні стан беларускай эканомікі.

Уступленьне Беларусі ў Мытны саюз мала што зьмяніла ў адносінах паміж афіцыйнымі Масквой і Менскам, хоць прыкметна палегчыла рух тавараў і паслуг на шырокай тэрыторыі былога СССР.

Пакуль Расея і Казахстан выказвалі непадробнае задавальненьне стварэньнем Мытнага саюзу з удзелам Беларусі, аказалася, што візыт сірыйскага прэзыдэнта ў Менск стаў чарговым крокам наперад на шляху будаўніцтва новай кааліцыі, якая павінна, па задуме яе аўтараў, аб'яднаць Беларусь, Сірыю і Вэнэсуэлу ў нейкую геапалітычную трыяду.

Неўзабаве прэзыдэнты гэтых трох краін павінны сустрэцца ў Дамаску, каб вызначыць асноўныя кірункі іх далейшага супрацоўніцтва, сярод якіх фігуруе, у прыватнасьці, такая важная і актуальная праблема сучаснасьці, як «дыстанцыйны зандаж Зямлі".

Аляксандр Лукашэнка сьціпла прызнаўся, што ідэя гэтага самага глябальнага зандажу належыць прэзыдэнту Вэнэсуэлы Уга Чавэсу, хаця, трэба прызнаць, першынства ў кантактным «зандажы» і пошуку мяжы рэсурсу цярпеньня ў эксплёатацыі саюзьніцкіх адносін ўсё ж належыць беларускаму лідэру, – робіць выснову «Голас Расіі».

Расейскае выданьне "Камэрсант" знайшло дыпляматычнага сьведку, які пацьвердзіў, што Аляксандр Лукашэнка сапраўды публічна на саміце СНД пакляўся вырашыць пытаньне аб прызнаньні Паўднёвай Асэтыі і Абхазіі. Дыпляматычная крыніца "Камэрсанта", якая прысутнічала на тым саміце, прыгадвае, што тады адзін з прэзыдэнтаў краін СНД адкрыта выказаў сумнеў у тым, што Аляксандр Лукашэнка сваё абяцаньне стрымае. Прэзыдэнт Беларусі адказаў на гэта эмацыйна: "Так, зраблю, не сысьці мне з гэтага месца!"
Нават калі заўтра Лукашэнка прызнае незалежнасьць дзьвюх рэспублік, гэта наўрад ці разрадзіць дачыненьні Масквы зь Менскам

Зрэшты, цяпер Дзьмітры Мядзьведзеў кажа, што Расея, хоць і зацікаўленая ў тым, каб у сьвеце прызнавалі Абхазію і Паўднёвую Асэтыю, але гэта не самамэта. "Такой задачы не стаяла і не стаіць", – запэўнівае прэзыдэнт РФ.

Падобная зьмена ў настроях Крамля можа быць выклікана тым, што кіраўнікі краін ЭЗ і ЗША ўсё менш крытыкуюць Маскву за рашэньне двухгадовай даўніны. На апошнім саміце Расея-ЭЗ у Растове прэзыдэнт ЭЗ Херман ван Ромпэй толькі мімаходзь выказаўся на гэтую тэму. А расейскія дыпляматы, якія курыруюць адносіны з Цхінвалі і Сухумі, прызнаюцца "Ъ", што апошнім часам Захад узяў курс на неафішаванае супрацоўніцтва з Абхазіяй і Паўднёвай Асэтыяй. «На ўзроўні трэцяступенных фігур ЭЗ і ЗША пачынаюць гульню з абхазамі і асэтынамі, каб у выніку вывесьці іх на неабходнасьць нармалізацыі стасункаў з Тбілісі, – кажа суразмоўца" Ъ ".– Калі гэта адбудзецца, і Абхазія з Паўднёвай Асэтыяй усталююць нейкую форму асацыяцыі з Тбілісі, мы будзем ня супраць ".

”Камэрсант” прыводзіць меркаваньне палітоляга Валера Карбалевіча, паводле якога праблема прызнаньня ўжо не такая актуальная для Крамля, і "нават калі заўтра Лукашэнка прызнае незалежнасьць дзьвюх рэспублік, гэта наўрад ці разрадзіць дачыненьні Масквы зь Менскам".

Нагадаць жа аб хлусьні Аляксандра Лукашэнкі, як лічыць экспэрт, прэзыдэнт РФ вырашыў для таго, каб растлумачыць інфармацыйную атаку на беларускага лідэра. "Калі Крэмль растлумачыць гэта тым, што Лукашэнка не пускаюць у краіну расейскі капітал," кідае "расейскі бізнэс, для звычайнага расейца гэта будзе недастатковай аргумэнтацыяй, – заявіў" Ъ "беларускі экспэрт .– А тут усё зразумела: ён нам здрадзіў".
XS
SM
MD
LG