На Віцебшчыне, у вёсцы Лучай Пастаўскага раёну, пачаўся 6-ты мастацкі пленэр «У пошуках Атлянтыды». Такія пленэры ладзяцца ў невялікіх мястэчках, дзе ёсьць архітэктурныя помнікі, якія вымагаюць рэстаўрацыі, або іншыя мясцовыя адметнасьці, якія варта захаваць для нашчадкаў.
Вёска Лучай месьціцца за 18 кілямэтраў ад райцэнтру Паставы, але з аўтатрасы Полацак — Вільня трэба збочыць і праехаць яшчэ тры кілямэтры на захад.
Крыніцай натхненьня для мастакоў стаў помнік архітэктуры 18 стагодзьдзя — касьцёл Сьвятога Тадэвуша, пабудаваны ў 1766-1776 гадах. Будынак ня быў разбураны ў Вялікую айчынную вайну, аднак з 1971 году ён быў зачынены і ператвораны ў калгасны склад. У 1990 годзе заняпалы будынак храму аддалі мясцовай каталіцкай парафіі, і з тае пары ён аднаўляецца, у тым ліку і за кошт дабрачынных ахвяраваньняў.
Група мастакоў, якія прыехалі зь Менску, Гомелю, Віцебску, Наваполацку, Паставаў, Верхнядзьвінску, атайбавалася ў былой мясцовай школе. Калісьці гэта быў будынак плябаніі, і неўзабаве ён зноў стане касьцёльнай маёмасьцю. Адзінае, што спачатку засмуціла, — гэта адсутнасьць электрычнасьці: пасьля таго як школа адсюль пераехала, электрыкі абрэзалі сьвятло.
Але ксёндз Мікалай, які шмат робіць, каб добраўпарадкаваць навакольле, ня толькі дазволіў падлучыцца да электрасеткі ў касьцёле, але і пазычыў шматмэтровы «падаўжальнік». Яго якраз хапіла да будынка, дзе жывуць мастакі.
На погляд менскай мастачкі Кацярыны Мясьніковай, адсюль адкрываюцца маляўнічыя краявіды. А тое, што, ашчаджаючы электрычнасьць, мастакі вячэраюць пры сьвечках, толькі надае рамантызму і натхненьня.
Васіль Пешкун і Ганна Селівончык прыехалі разам з 9-гадовай дачушкай, наймалодшай удзельніцай пленэру. Маша Пешкун, як і дарослыя мастакі, штодня выходзіць «на этуды».
Тое, што пасьпелі зрабіць, мастакі абмяркоўваюць паміж сабой. А напрыканцы пленэра, 12 ліпеня, адбудзецца першая выстава твораў з лучайскага пленэру, на якую запросяць усіх мясцовых жыхароў.
Вёска Лучай невялікая, тут жывуць усяго каля сотні вяскоўцаў. Але мясцовы касьцёл ужо стаўся вядомым экскурсійным аб’ектам: сюды прыяжджаюць і тыя, хто адпачывае ў санаторыях на Нарачы, і тыя, хто дабіраецца ўласным аўтатранспартам. Аздабленьне пляцоўкі вакол храму чымсьці нагадвае Мосар — знакаміты «беларускі Вэрсаль», створаны імпэтам і талентам ужо нябожчыка ксяндза Ёзаса Булькі. Перад уваходам у касьцёл у 2008 годзе быў усталяваны адзіны ў Беларусі і першы ў сьвеце помнік папу рымскаму Бэнэдыкту ХVI.
Мясцовы ксёндз Мікалай шмат займаецца рамонтам будынка — пад ягоным кіраўніцтвам касьцёл фарбуюць звонку і вычышчаюць сутарэньні. На чарзе — будынак плябаніі.
Мэта пленэраў «У пошуках Атлянтыды», паводле ініцыятаркі іх правядзеньня, паэткі Леры Сом, якраз і палягае ў тым, каб прыцягнуць увагу да падобных архітэктурных помнікаў. Яны ці пакрысе аднаўляюцца, ці маюць пільную патрэбу ў рэстаўрацыі. І мастакі спрабуюць перадаць унікальнасьць гэтых аб’ектаў.
Пазьней, калі мастацкія працы будуць канчаткова завершаныя, выставы твораў удзельнікаў пленэру пройдуць у Віцебску, Полацку, Воршы і Менску. У гэтых гарадох ужо выстаўляліся працы, напісаныя падчас мінулых пленэраў у Лявонпалі, Дзісьне, Друі, Асьвеі і Вопсе.
Вёска Лучай месьціцца за 18 кілямэтраў ад райцэнтру Паставы, але з аўтатрасы Полацак — Вільня трэба збочыць і праехаць яшчэ тры кілямэтры на захад.
Крыніцай натхненьня для мастакоў стаў помнік архітэктуры 18 стагодзьдзя — касьцёл Сьвятога Тадэвуша, пабудаваны ў 1766-1776 гадах. Будынак ня быў разбураны ў Вялікую айчынную вайну, аднак з 1971 году ён быў зачынены і ператвораны ў калгасны склад. У 1990 годзе заняпалы будынак храму аддалі мясцовай каталіцкай парафіі, і з тае пары ён аднаўляецца, у тым ліку і за кошт дабрачынных ахвяраваньняў.
Група мастакоў, якія прыехалі зь Менску, Гомелю, Віцебску, Наваполацку, Паставаў, Верхнядзьвінску, атайбавалася ў былой мясцовай школе. Калісьці гэта быў будынак плябаніі, і неўзабаве ён зноў стане касьцёльнай маёмасьцю. Адзінае, што спачатку засмуціла, — гэта адсутнасьць электрычнасьці: пасьля таго як школа адсюль пераехала, электрыкі абрэзалі сьвятло.
Але ксёндз Мікалай, які шмат робіць, каб добраўпарадкаваць навакольле, ня толькі дазволіў падлучыцца да электрасеткі ў касьцёле, але і пазычыў шматмэтровы «падаўжальнік». Яго якраз хапіла да будынка, дзе жывуць мастакі.
На погляд менскай мастачкі Кацярыны Мясьніковай, адсюль адкрываюцца маляўнічыя краявіды. А тое, што, ашчаджаючы электрычнасьць, мастакі вячэраюць пры сьвечках, толькі надае рамантызму і натхненьня.
Васіль Пешкун і Ганна Селівончык прыехалі разам з 9-гадовай дачушкай, наймалодшай удзельніцай пленэру. Маша Пешкун, як і дарослыя мастакі, штодня выходзіць «на этуды».
Тое, што пасьпелі зрабіць, мастакі абмяркоўваюць паміж сабой. А напрыканцы пленэра, 12 ліпеня, адбудзецца першая выстава твораў з лучайскага пленэру, на якую запросяць усіх мясцовых жыхароў.
Вёска Лучай невялікая, тут жывуць усяго каля сотні вяскоўцаў. Але мясцовы касьцёл ужо стаўся вядомым экскурсійным аб’ектам: сюды прыяжджаюць і тыя, хто адпачывае ў санаторыях на Нарачы, і тыя, хто дабіраецца ўласным аўтатранспартам. Аздабленьне пляцоўкі вакол храму чымсьці нагадвае Мосар — знакаміты «беларускі Вэрсаль», створаны імпэтам і талентам ужо нябожчыка ксяндза Ёзаса Булькі. Перад уваходам у касьцёл у 2008 годзе быў усталяваны адзіны ў Беларусі і першы ў сьвеце помнік папу рымскаму Бэнэдыкту ХVI.
Мясцовы ксёндз Мікалай шмат займаецца рамонтам будынка — пад ягоным кіраўніцтвам касьцёл фарбуюць звонку і вычышчаюць сутарэньні. На чарзе — будынак плябаніі.
Мэта пленэраў «У пошуках Атлянтыды», паводле ініцыятаркі іх правядзеньня, паэткі Леры Сом, якраз і палягае ў тым, каб прыцягнуць увагу да падобных архітэктурных помнікаў. Яны ці пакрысе аднаўляюцца, ці маюць пільную патрэбу ў рэстаўрацыі. І мастакі спрабуюць перадаць унікальнасьць гэтых аб’ектаў.
Пазьней, калі мастацкія працы будуць канчаткова завершаныя, выставы твораў удзельнікаў пленэру пройдуць у Віцебску, Полацку, Воршы і Менску. У гэтых гарадох ужо выстаўляліся працы, напісаныя падчас мінулых пленэраў у Лявонпалі, Дзісьне, Друі, Асьвеі і Вопсе.