Лінкі ўнівэрсальнага доступу

logo-print

Частка актывістаў Партыі БНФ сёньня заявіла, што цягам выбарчай кампаніі будзе працаваць у камандзе кандыдата ў прэзыдэнты Андрэя Саньнікава. Пра гэта на прэсавай канфэрэнцыі паведамілі такія вядомыя ў фронце асобы, як старшыні менскіх гарадзкой і абласной арганізацыяў Віктар Івашкевіч і Зьміцер Вінаградаў, партыйныя вэтэраны Юры Хадыка, Валянцін Голубеў, мастакі Аляксей Марачкін і Алесь Шатэрнік, сябры кіраўніцтва некаторых раённых філіяў.

Партыйныя актывісты напачатку патлумачылі, чаму яны і іх калегі пераходзяць да Андрэя Саньнікава. Аргумэнты зводзіліся галоўным чынам да пераліку станоўчых якасьцяў патэнцыйнага кандыдата на пасаду прэзыдэнта. Юры Хадыка, у прыватнасьці, адзначыў:

Юры Хадыка
«Я глыбока перакананы, што кіраваць краінай павінны людзі, якія, як гэта гавораць амэрыканцы, валодаюць адпаведным IQ — ступеньню інтэлектуальнага разьвіцьця. Хопіць нам кіроўцаў ад пліты, ад фэрмы. Усе нашы беды паходзяць ад недастатковай падрыхтаванасьці нашай улады да правядзеньня разумнай незалежнай палітыкі. З гэтага пункту погляду Саньнікаў — бездакорная кандыдатура. Ён паходзіць зь беларускамоўнай інтэлігентнай сям’і, атрымаў добрую адукацыю, працаваў на адказных дзяржаўных пасадах. І гэта ёсьць гарантыя таго, што мы не пачнём у чарговы раз хістацца ад любові да бліжэйшай суседкі да нянавісьці».

Першым з гэтай групы пра свой пераход у каманду Андрэя Саньнікава публічна заявіў кіраўнік менскай гарадзкой партыйнай арганізацыі Віктар Івашкевіч. Адбылося гэта яшчэ два тыдні таму на партыйным сойме. Тады на адрас Івашкевіча прагучалі прапановы сысьці з партыйнай пасады і наагул перапыніць сяброўства ў БНФ. Сёньня Віктар Івашкевіч паведаміў:

Віктар Івашкевіч
«Заўчора адбылося паседжаньне рады менскай гарадзкой арганізацыі, дзе я спытаўся: ці хто-небудзь ставіць пытаньне аб маім сыходзе з пасады кіраўніка гарадзкой арганізацыі альбо сыходзе з Фронту? Ніхто такога пытаньня не паставіў. І таму ніякіх пераабраньняў менская гарадзкая арганізацыя не плянуе. Прынятае рашэньне праводзіць раённыя сходы актывістаў Фронту, каб людзі мелі магчымасьць самастойна вызначыцца, якога кандыдата падтрымліваць і ў якой форме нашым актывістам удзельнічаць у прэзыдэнцкай кампаніі».

Афіцыйны кандыдат у прэзыдэнты ад Партыі БНФ — намесьнік старшыні партыі Рыгор Кастусёў. Сёньня ў размове са «Свабодай» ён сказаў, што яму прыкра чуць пра такія дзеяньні некаторых сяброў партыі, асабліва тых, хто ўдзельнічаў у стварэньні БНФ:

Рыгор Кастусёў
«Для мяне вельмі непрыемна і прыкра, што Партыя БНФ, якая лічыцца вядучай палітычнай сілай у апазыцыйным коле, ад 1994 году ня мае свайго кандыдата ў прэзыдэнты. Я ўзяў на сябе гэтую ролю, адказнасьць, цяжар, пагадзіўся на прапанову кіраўніцтва партыі, асабіста Аляксея Янукевіча ўзваліць на свае плечы такі цяжар. Гэтым самым я спадзяваўся ў значнай ступені накіраваць працу ўнутры партыі на аб’яднаньне, на спыненьне рознагалосьсяў, якія адбываліся апошнім часам.

Да мяне і раней даходзілі чуткі, што шэраг нашых кіраўнікоў з былога кіраўніцтва партыі даўно ўжо вялі перамовы з Саньнікавым, каб здаць Партыю БНФ у арэнду і працаваць на Саньнікава. Але тады былы старшыня партыі Баршчэўскі даказваў, што такіх перамоваў не было і яны нават немагчымыя. Аднак зараз многія менскія актывісты ўжо адкрыта заявілі, што яны падтрымліваюць Саньнікава. І я ўспрымаю такія заявы як здраду беларускім інтарэсам, інтарэсам партыі БНФ, здраду намаганьням партыі, якія яна прыкладала для адраджэньня нашых каштоўнасьцяў».

Паказаць камэнтары

XS
SM
MD
LG