Два дні запар на суд не зьяўляліся тры сьведкі, на чыіх паказаньнях, згодна зь міліцэйскім пратаколам, і грунтаваліся абвінавачаньні.
Сёньня судзьдзя абвясьціў рашэньне: адміністрацыйную справу ў дачыненьні да Івана Крука спыніць з-за адсутнасьці складу правапарушэньня.
Вось што сказаў нашаму радыё Іван Крук, пасьля таго як выйшаў сёньня з суду:
Крук: "Я такога рашэньня, канечне, не чакаў. Але яно законнае, аб’ектыўнае. Цяжка сказаць, што сыстэма дала збой, але я прадставіў суду неабвержныя факты: у справе было 18 дакумэнтаў, і на кожны я даў законны адказ. І суд гэта ўзяў пад увагу".
Алег Рамашкевіч і ягоныя сябры, якія прыйшлі на паседжаньне, з прычыны непаразуменьня ў патрэбную залю ня трапілі, і разгляд справы адбыўся бяз іх. Прысуд пакінулі бязь зьменаў. Дарэчы, на паседжаньні прысутнічалі прадстаўнікі Бераставіцкага райвыканкаму, якіх своечасова і правільна праінфармавалі пра месца разгляду. Алег Рамашкевіч надалей не пагаджаецца з рашэньнем суду.
Рамашкевіч: "Зроблена, я думаю, гэта было спэцыяльна, бо гэтая справа носіць палітычны характар, бо гэтая справа датычыць выбараў. Я не прысутнічаў падчас разгляду і ня мог паглядзець нікому ў вочы і слова сказаць. Я зрабіў запіс у кнізе скаргаў і напісаў, што мяне папросту падманулі".
Нагадаю, што Алега Рамашкевіча аштрафавалі на 875 тысяч рублёў за тое, што падчас выбарчай кампаніі ён нібыта на трох пад’ездах у вёсцы Малая Бераставіца разьвесіў свае агітацыйныя ўлёткі.
Алег Рамашкевіч ужо некалькі гадоў запар ня можа знайсьці працу ў Бераставіцкім раёне. У яго трое малых дзетак і жонка, якая працуе ў дзіцячым садку.
