Напярэдадні прафэсійнага сьвята міністар казаў выключна пра дасягненьні сыстэмы аховы здароўя ў мінулым годзе. У тым ліку — пра павелічэньне колькасьці апэрацый па перасадцы ўнутраных органаў, пра разьвіцьцё высокіх тэхналёгій і навукі. І толькі адказваючы на пытаньні журналістаў, прызнаў, што заробкі мэдыкаў складаюць 76% ад сярэдняга заробку ў народнай гаспадарцы. Аднак гэткае становішча неўзабаве будзе выпраўлена, запэўніў Васіль Жарко:
«Так, намі распрацаваны праект указу кіраўніка краіны пра істотнае павышэньне заробку. Зараз ён знаходзіцца ва ўрадзе на ўзгадненьні зь іншымі міністэрствамі і ведамствамі, а затым будзе перададзены ў адміністрацыю. Зь вялікай верагоднасьцю магу сказаць, што падвышэньне заробку адбудзецца. Калі? Магчыма, што ў чацьвёртым квартале».
ь вялікай верагоднасьцю магу сказаць, што падвышэньне заробку адбудзецца.
«Каб зьняць гэтую праблему, мы далі для ўстаноў аховы здароўя, нават коштам іншых рэгіёнаў, больш за 500 выпускнікоў. У апошнія гады таксама павялічылі набор лекараў да 2 700 чалавек, і 50% зь іх — коштам пазабюджэтнага навучаньня. Але на наступны год будзем набіраць менш, каб праз шэсьць гадоў не стварыць праблему перанасычанасьці працоўнымі рэсурсамі. Бо кожны лекар будзе працаваць — мінімум — на 1,2 стаўкі. Ня ўсе пэнсіянэры адразу пойдуць на пэнсію, і ім таксама неабходна забясьпечыць працоўнае месца. Гэткім чынам да 2013 году мы выйдзем на ўкамплектаваньне сыстэмы аховы здароўя цалкам».
Праблема недахопу стацыянарных месцаў у шпіталях, якая асабліва заўважна выявілася ў мінулагоднюю эпідэмію грыпу, праблема забесьпячэньня аптэк мэдычнымі прэпаратамі, бюракратычны характар сыстэмы аховы здароўя і многія іншыя засталіся ў перадсьвяточным выступе па-за ўвагай міністра, але мэдыкі ў сваёй працы сутыкаюцца зь імі штодзень. Гаворыць лекар аднаго зь менскіх шпіталяў Андрэй Вітушка:
«Вядома, што людзей лечыць не апаратура, а іншыя людзі. І каб была якасная і прафэсійная праца з пацыентамі, людзі, якія іх лечаць, павінны быць задаволеныя і матываваныя. А ў нас зараз сыстэма аховы здароўя і яе мэнэджмэнт больш зацікаўленыя такімі рэчамі, як паказчыкі, працэнты, каэфіцыенты і гэтак далей. І на чалавека — пацыента — застаецца вельмі і вельмі мала часу. Гэтыя і іншыя праблемы настолькі сур’ёзныя, што па меры іх нарастаньня яны могуць паставіць пад пагрозу дзейнасьць самой сыстэмы».
Як паведаміў міністар аховы здароўя Васіль Жарко, каб дапамагчы лекарам у выпісваньні рэцэптаў, лістоў непрацаздольнасьці і іншай дакумэнтацыі, неўзабаве ў шпіталях і паліклініках краіны зьявяцца новыя штатныя адзінкі — памочнікі лекараў.
