Лінкі ўнівэрсальнага доступу

З 9 чэрвеня ў Менску зноў пачалі браць грошы за паркоўку аўтамабіля ў адмыслова прызначаных месцах. Аплата прадугледжаная толькі праз паркамат.

Грошы за стаянку аўтамабіля шмат дзе ў Менску бралі і дагэтуль, аднак фармулёўка гучала і гучыць як «плата за захаваньне машыны» — напрыклад, на паркінгах ля Камароўскага рынку ці на рынку ў Ждановічах. А вось за права пакінуць машыну на нейкі час менскія аўтамабілісты не плацілі ад 1 студзеня гэтага году. Цяпер давядзецца гэта рабіць на 5 паркоўках, якія месьцяцца на вуліцах Харужай, Мясьнікова, Ульянаўскай, Кальварыйскай, а таксама на Паўднёвай плошчы, што ля дыспэтчарскай станцыі «Дружная». Гэтыя новыя паркоўкі абсталяваныя паркаматамі і шлягбаўмамі, якія не дазваляюць выехаць без аплаты. Прысутнічаюць на паркоўках і кантралёры.

Платныя паркоўкі — гэта сродак барацьбы зь вялікай транспартнай загружанасьцю цэнтральнай часткі Менску, камэнтуе навіну дырэктар Дзяржаўнай установы «Паркоўкі сталіцы» Леанід Дарашчонак:

«Па прыклад далёка хадзіць ня трэба. Калі вы бывалі ў Варшаве, то ведаеце: цэнтральная частка гораду ўся платная. Пешаходныя зоны вольныя, і ходнікі вольныя — усё вольнае, таму што любы варшавянін, які едзе ў цэнтральную частку гораду, ведае, што трэба плаціць, таму ён пакідае машыну там, дзе плаціць ня трэба, а далей сядае ў мэтро, аўтобус, тралейбус».

Разьлічыцца зь беларускім парковачным тэрміналам з дапамогай наяўных грошай не атрымаецца. Калі вы жадаеце пакінуць машыну на адной з такіх новых парковак, дык трэба папярэдне набыць у шапіку «Белсаюздруку» адмысловую электронную картку, уставіць яе ў паркамат і выбраць, колькі часу вашае аўто будзе на паркоўцы. Тэрмінал павінен выдаць чэк, які абавязкова трэба запхнуць за шкло. Паміж 9-й і 19-й гадзінамі дваццаць хвілінаў паркоўкі каштуюць 1 тысячу рублёў, гадзіна — 2 тысячы. Уначы тарыфы ніжэйшыя.

Ці атрымаецца ў чыноўнікаў разгрузіць цэнтральныя вуліцы Менску? Гаворыць Павал Мурашка, вядоўца беларускай тэлепраграмы «Аўтапанарама»:

Людзі будуць проста шкадаваць плаціць грошы за паркоўку і, адпаведна, будуць забіваць машынамі ўсе навакольныя двары, вуліцы, пераезды, завулкі.
«З улікам беларускага мэнталітэту гэта можа яшчэ пагоршыць сытуацыю з паркоўкамі ў тым сэнсе, што людзі будуць проста шкадаваць плаціць грошы за паркоўку і, адпаведна, будуць забіваць машынамі ўсе навакольныя двары, вуліцы, пераезды, завулкі — усё, што будзе ў радыюсе 300 мэтраў ад платнай паркоўкі, якая тым часам можа заставацца цалкам вольнай».

Павал Мурашка лічыць, што паркаматы — гэта крок наперад, але бальшыня беларускіх аўтааматараў яшчэ проста не гатовая да такіх зьменаў:

«Гэта вельмі цывілізавана — не плаціць там нейкаму памятаму паркоўшчыку бяз рэшты, без квітка ці „на кішэню“, а проста падышоў да паркамата, заплаціў, квіток пад шкло — і спакойна ідзеш у офіс, працуеш. Канечне, гэта цывілізаваны шлях, але баюся, што беларусы да яго яшчэ не дарасьлі».

Колькасьць платных парковак у цэнтры Менску плянуюць павялічваць, аднак дакладныя лічбы і даты пакуль не называюцца — шмат што ўпіраецца ў фінансы. Апрача таго, на паркоўках, якія знаходзяцца проста на вуліцы, шлягбаўм паставіць немагчыма, а для таго, каб прымяняць мэханізмы блякаваньня, няма заканадаўчай базы.


Глядзець платныя паркоўкі на мапе


Паглядзець мапу вялікага памеру

XS
SM
MD
LG