Лінкі ўнівэрсальнага доступу

Чэрвень з Быкавым: “Вайны хапіла на ўсіх...”


У чэрвені 2002 году Васіль Быкаў у Празе на просьбу Радыё Свабода начытаў кнігу ўспамінаў “Доўгая дарога дадому”, якая неаднаразова гучала на хвалях Свабоды. Сёлета мы падрыхтавалі падарунак нашым слухачам – выдалі дыск з аўдыёзапісамі аўтарскага чытаньня. На ім таксама зьмешчаныя поўныя тэксты мэмуарнай прозы Быкава, а таксама ўсе кнігі, якія выйшлі ў сэрыі “Бібліятэка Свабоды. 21-ае стагодзьдзе”, і ў тым ліку – кніга “Быкаў на Свабодзе”.


Васіль Быкаў: “Вестка пра гэту вайну застала мяне далёка ад дому, на ўкраінскай Чарнігаўшчыне, і вядома ж, першаю думкай было – трэба дамоў. Але дамоў не пусьцілі. Моладзь змабілізавалі на абарончыя работы, і я з маімі аднагодкамі два месяцы капаў глыбачэзныя супрацьтанкавыя равы за Гомляй і дужа гараваў, што не пасьпею са зброяй у руках абараніць радзіму. Бо, як заўжды, паліторганамі вялася інтэнсіўная прапаганда, якая ўводзіла ў маладыя душы, можа, самую вялікую на той час няпраўду, паводле якой вайна не задоўжыцца. Нямецкі рабочы кляс з клясавай салідарнасьці вось-вось паўстане супраць Гітлера і паратуе братні рабочы кляс у СССР. На тое была ўся надзея. Бо вельмі хутка выявілася, што Чырвоная армія ці ня ўся адступала альбо здалася ў палон і ня можа нікога абараніць. Абараняць СССР давялося нам, каму на той час было толькі 17 гадоў. Разам з арміяй я адступаў да Харкава, затым да Варонежа, затым быў запасны полк і паскораная Саратаўская пяхотная вучэльня, зь якой зноў вярнуўся на Ўкраіну. Вайны хапіла на ўсіх аж занадта...”





Ад панядзелка да пятніцы ў нашым эфіры – карокая цытата для роздуму і для памяці. Кожную суботу і нядзелю - тэматычныя аўдыё-анталёгіі.
Калі вы хочаце атрымаць дыск – пішыце на адрас Свабоды: Менск, 220005, паштовая скрынка 111.

Увесь чэрвень месяц нараджэньня і сьмерці пісьменьніка – штодня на хвалях Свабоды будзе гучаць цытата Васіля Быкава.

***

Гл. таксама:

Быкаў на Свабодзе. — 2005. — 662 с.: іл. — 2-е выд. (PDF)

Чытаем Быкава

Наш Васіль Быкаў. На пытаньні пра жыцьцё і творчасьць пісьменьніка адказваюць Ірына Міхайлаўна Быкава, ягоныя сябры, блізкія яму асобы.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG