Два дзясяткі супрацоўнікаў міліцыі ў форме і цывільным пад’ехалі на вуліцу Ленінскую ў падворак дому № 29, дзе разьмешчаныя сядзібы, апоўдні. Кіраўнікам арганізацыяў прад’явілі пастанову на ператрус, падпісаную старшым сьледчым аддзелу міліцыі Ленінскага раёну Юхневічам. Ператрус санкцыянаваў пракурор гэтага ж раёну Ігар Украінец.
«У гэтай пастанове ўказана, што ў дадзеным офісе нібыта могуць знаходзіцца рэчы, здабытыя злачынным шляхам, альбо дакумэнты, альбо матэрыялы, якія маюць дачыненьне да расьсьледаваньня крымінальнай справы. На нашае пытаньне „Якія матэрыялы вы шукаеце?“ яны адказалі — усё што тычыцца апазыцыйных матэрыялаў. Блакітны балёнік „Гавары праўду“ яны палічылі апазыцыйным матэрыялам», паведаміў «Свабодзе» праваабаронцы Сяргей Фамін.
Ён прысутнічаў падчас ператрусу ў сядзібе дабрачыннага фонду «Шчырасьць».
Кіраўніку грамадзкай установы «Рух наперад» Сяргею Лапуціну супрацоўнікі сілавых структураў патлумачылі, што ў сядзібе яго арганізацыі знаходзяцца матэрыялы, якія утрымліваюць інфармацыю паклёпніцкага характару на дзяржаўныя органы, у тым ліку на прэзыдэнта.
Ператрус у офісах доўжыўся каля чатырох гадзінаў.
