Лінкі ўнівэрсальнага доступу

У Віцебску адкрылі мэмарыяльную частку плошчы Перамогі


65-я ўгодкі Перамогі ў Віцебску сьвяткуюць два дні запар. Заўтра тут адбудзецца традыцыйны парад з удзелам вэтэранаў, а сёньня ўрачыста адкрывалі плошчу Перамогі, рэстаўрацыя якой доўжылася больш за паўтара году.


Ініцыятарам рэстаўрацыі плошчы быў на той час новапрызначаны старшыня Віцебскага аблвыканкаму Аляксандар Косінец.

Паводле зацьверджанага ім праекту, на плошчы выкарчавалі рэдкія дрэвы, прывезеныя сюды з краінаў, вызваленых ад фашызму беларускімі жаўнерамі, і ўсю тэрыторыю заклалі тратуарнай пліткай. Такім чынам частка плошчы, дзе гараджане маглі адпачыць, ператварылася ў вялізную забаўляльную пляцоўку з двума сьвятладыёднымі экранамі, на якіх круглыя суткі трансьлююць канцэрты.

Трансьлююць выступ Аляксандра Косінца. Ахвотных глядзець няма.

Сёньня Аляксандар Косінец урачыста адкрыў другую частку плошчы Перамогі — уласна мэмарыяльную. Ягоны выступ таксама быў паказаны віцебскім мінакам, але яны ў большасьці прыйшлі сюды не для гэтага — проста каб прагуляцца зь дзецьмі каля фантанаў ды паглядзець, наколькі зьмянілася рэканструяваная частка плошчы.

Народу на адкрыцьцё сабралася няшмат.

Зрэшты, спачатку ўсіх ахвотных падысьці да манумэнта вызваліцелям на пусьцілі. Да «трох штыкоў», як у народзе завецца гэты помнік, прайшлі чыноўнікі і вэтэраны, якім адмыслова да сьвята выдалі чырвоныя бэйсболкі. Потым пусьцілі ўсіх — бо пераканаліся, што ажыятажу няма. На плошчу прыйшлі хіба толькі бацькі са сваімі дзецьмі — пераважна вучнямі малодшых клясаў суседняй школы № 2, БРСМаўцы з чырвона-зялёнымі сьцяжкамі, міліцыянты і спадары ў цывільным з рацыямі ў адным вуху, апранутыя ў амаль аднолькавыя гарнітуры. А яшчэ прыбіральшчыкі, якіх абавязалі тут жа вымятаць проста з-пад ног мінакоў нават самае дробнае сьмецьце.

Спадары з камэрамі і рацыямі — на кожным кроку
Адным — сьвята, іншым — праца.

Цырымонія адкрыцьця была ня дужа працяглай. Выступілі старшыня аблвыканкаму, прадстаўнікі вэтэранскай арганізацыі ды праваслаўны сьвятар. Потым усіх запрасілі на «салдацкую кашу» — неад’емны элемэнт на падобнага кшталту імпрэзаў.

Чарга да палявой кухні.

Ахвотныя маглі паглядзець канцэрт мастацкай самадзейнасьці, прычым для вэтэранаў, чамусьці, абсталявалі глядзельную залю на самым санцапёку.

Вэтэраны глядзяць канцэрт.

А бацькі зь дзецьмі пайшлі фатаграфавацца ў таксама адкрытую сёньня Алею славы. Так цяпер завецца пляцоўка на ўскрайку плошчы Перамогі, куды з усяе вобласьці звозілі вайсковую тэхніку, якая брала ўдзел у вызваленьні тамтэйшых гарадоў і мястэчак. Баявыя машыны сталага веку і пачэснага лёсу сталіся проста фотаантуражам.

Тэхніку паставілі, а ўласна алею высадзіць не пасьпелі.
Зброю — дзецям?
«Адваяваліся».
XS
SM
MD
LG