Старшыня Цэнтральнай выбарчай камісіі заклікала не паўтараць сёлетніх памылак: уважліва рыхтаваць сьпісы выбарцаў, правяраць друкаваную прадукцыю і г.д. Казала яна і пра высокую адказнасьць пры правядзеньні прэзыдэнцкіх выбараў.
Журналісты нагадалі Лідзіі Ярмошынай выказваньні Аляксандра Лукашэнкі двухдзённай даўніны пра тое, што чарговыя прэзыдэнцкія выбары будуць вельмі цяжкімі:
«Вельмі цяжкая будзе выбарчая кампанія. Вельмі цяжкая. І калі ў гэтай кампаніі давядзецца ўдзельнічаць дзейнаму прэзыдэнту, то яна будзе яшчэ цяжэйшай. Таму што вы бачыце, каму тут дзейны прэзыдэнт не падабаецца, каму тут ня ў лад. І на Захадзе, і на Ўсходзе».
Спадарыня Ярмошына так пракамэнтавала гэтае выказваньне:
«Мне цяжка казаць, паколькі я думаю, што цяжкасьці ўсё ж такі будуць не ўнутры краіны, а з-за яе межаў. Таму, я думаю, кіраўнік дзяржавы ўсё ж меў на ўвазе нейкі міжнародны ціск, пра які ён лепш праінфармаваны за мяне».
Палітоляг Вацлаў Арэшка лічыць інакш: ціск не абмяжоўваецца толькі замежжам:
«Унутраная сытуацыя ў Беларусі паступова зьмяняецца. Стаўленьне народу да ўлады за апошні год зьмянілася. І яно будзе ўсё горшым і горшым. І ўсё больш людзей зьвязваюць пагаршэньне свайго эканамічнага стану ня проста з уладай, а канкрэтна — з Аляксандрам Лукашэнкам, зь яго прэзыдэнцтвам. І, я думаю, менавіта гэта найбольш яго хвалюе. І ён сапраўды баіцца гэтых выбараў, бо яны стануць штуршком для сур’ёзных зьменаў у Беларусі».
Лідзія Ярмошына паведаміла, што фактычна вынікі выбарчай кампаніі зацьверджаныя. У Беларусі не абраныя толькі 15 дэпутатаў у мясцовыя саветы з агульнай колькасьці 21303.
Паводле дадзеных ЦВК, на гэты дзень яшчэ не разгледжана 18 скаргаў. Амаль усе яны тычацца адной і той жа праблемы: немагчымасьці для кандыдатаў, давераных асобаў альбо назіральнікаў назіраць за падлікам галасоў з такой адлегласьці, каб быў відзён рэальны падлік галасоў.
Гэтыя скаргі, паводле паведамленьняў выбарчай камісіі, будуць разгледжаныя на наступным тыдні.