«На што выдзяляюцца сродкі, тое й робіцца. Да дзявятага траўня будуць выдзеленыя сродкі, і ўсё будзе прыводзіцца ў парадак».
Супрацоўніца крычаўскай арганізацыі вэтэранаў вайны пытаньне пра занядбаны выгляд помніка ўспрыняла нэрвова. Завучана паўтарыла, як і супрацоўніца ідэалягічнага аддзелу — да дзявятага траўня адрамантуем.
«Дый не адвальваецца там нічога. Там усё прыводзіцца ў парадак. Там ужо сёньня вядуцца працы. Ля гэтага помніка тры разы на год праводзяцца мітынгі — гэта на 9 траўня, 3 ліпеня й 30 верасьня. Таксама праводзяцца масавыя гуляньні».
Ніякіх працаў каля помніка, аднак, не вядзецца, паведаміў крычаўскі журналіст Сяргей Няроўны:
«Шчыт нейкі прымацавалі там, і толькі. Улады да сытуацыі з помнікамі ставяцца абсалютна цынічна. Калі колькасьць вэтэранаў яшчэ зьменшыцца, то зацікаўленьне ўлады спадзе да нуля».
За сто мэтраў ад помніка крычаўцам, якія загінулі ў Другой усясьветнай вайне, — яшчэ адзін памятны знак. На мэталёвай стэле — самалёт. Зьвярнуць увагу на ягоны стан папрасіў адзін з жыхароў райцэнтру. У тым, як выглядае знак, ён вінаваціць начальніка раённай камунальнай гаспадаркі:
«Поўнасьцю борт самалёта знаходзіцца ў самым паганым стане. Напэўна, трэба было яго срэбнай фарбай асьвяжыць. Ці ня сорамна спадару Коршунаву глядзець на гэта? Бо гэта ж і яго праца, яго адказнасьць».
У 1964 годзе ваенны лётчык Віктар Дашкін адвёў убок ад цэмэнтна-шыфэрнага заводу свой сапсаваны самалёт, чым выратаваў і само прадпрыемства, і яго працаўнікоў.