Шэф-рэдактар "Народнай Волі" Сьвятлана Калінкіна кажа, што гэта працяг пікету вэтэранаў, але гэтым разам прыйшлі ўжо маладыя людзі – прадстаўнікі менскай арганізацыі БРСМ. Прэтэнзіі ў іх былі тыя ж самыя, як і тыдзень таму ў вэтэранаў, якія таксама пікетавалі рэдакцыю газэты, – перадрук кнігі Ільлі Копыла "Нябышына. Вайна".
"Калі я ў іх запыталася, адкуль жа яны ведаюць, што адбывалася ў вёсцы Нябышына, хто ў іх там служыў ці хто ім расказваў пра тыя падзеі, адказу так і не атрымала. Адзінае, што яны адказалі, што вайна адна і тая ж паўсюль, што такія рэчы, як кніга Ільлі Копыла, друкаваць нельга", – кажа Калінкіна.
Шэф-рэдактар адзначыла, што пікетоўцы паводзілі сябе не так агрэсіўна, як вэтэраны ў часе мінулага пікекту. "Магчыма, гэтае маладое пакаленьне ўсё ж разумее, што могуць быць альтэрнатыўныя погляды на адны і тыя ж рэчы", – спадзяецца Калінкіна.
Актывісты БРСМу пакінулі ў рэдакцыі кнігу "Памяць. Мінск".
"Мы зараз у здагадках, хто ж яшчэ можа прыйсьці з нашу рэдакцыю з пікетам?" – кажа спадарыня Калінкіна.
