Лінкі ўнівэрсальнага доступу

Бліц-агляд падзеяў і тэмаў у Беларусі, сьвеце, гісторыі.





СОНЕЧНА...


...амаль увесь дзень. Тэмпэратура: +2 — +16 С.

ТАКСАМА Ў ГЭТЫ ДЗЕНЬ:


У 1906 нарадзіўся ірляндзкі пісьменьнік Сэмюэл Бэкет, ляўрэат Нобэлеўскай прэміі (1969).

У 1943 нямецкія акупацыйныя войскі на Смаленшчыне ў лесе каля вёскі Катынь адкрылі масавыя пахаваньні польскіх афіцэраў, расстраляных перад вайною карнікамі НКВД.

У 1949 савецкія органы арыштавалі ксяндза Адама Станкевіча — аднаго з найбуйнейшых дзеячоў беларускага адраджэньня ХХ ст., асьветніка, змагара за беларусізацыю касьцёла. Арыштаваны на сваёй кватэры ў Вільні, Станкевіч быў засуджаны на 25 гадоў ГУЛАГу. Ксёндз Станкевіч памёр праз паўгоду пасьля высылкі на катаргу.

13 красавіка 1995 году дэпутаты Вярхоўнага Савету Беларусі з парушэньнем працэдуры прынялі пастанову аб правядзеньні рэфэрэндуму, ініцыяванага прэзыдэнтам Лукашэнкам. Рэч у тым, што адразу Вярхоўны Савет адмовіўся праводзіць гэты рэфэрэндум, і Лукашэнка прыгразіў, што правядзе яго бяз згоды парлямэнту. Каб запалохаць дэпутатаў, ён увёў у Авальную залю вайскоўцаў, якія гвалтам выкінулі з будынку дэпутатаў ад апазыцыі БНФ. Запалохваньне спрацавала, і на наступны дзень тыя дэпутаты, што засталіся ў Вярхоўным Савеце, пагадзіліся на рэфэрэндум аб беларускай мове і дзяржаўнай сымболіцы.

ТАМ ДЗЕ НАС НЯМА:


У Вашынгтоне, пры нагодзе саміту ядзернай бясьпекі, сустракаюцца прэзыдэнт Армэніі Сэрж Саркісян і прэм’ер-міністар Турцыі Рэджэп Эрдаган.

Мішэл Абама, першая дама ЗША, наведвае Мэксіку.

ЁСЬЦЬ НАГОДА:


Радаўніца (Радуніца) — дзень памінаньня памерлых ва ўсходніх славянаў, у які са старажытных часоў адбываліся трызны на магілах бацькоў і блізкіх сваякоў. Радаўніца адзначаецца праз тыдзень пасьля Вялікадня, заўжды ў аўторак. Спачатку ідуць памінаць блізкіх у царкву, а потым на могілкі.

МІНУС 365:


Год таму на сайце Свабоды: "Вацлаў Гавэл — ганаровы сябра Беларускага ПЭН-цэнтру".

ЦЫТАТА НА ПАМЯЦЬ:


"Усё, што мы маем, гэта словы" — Сэмюэл Бэкет.
XS
SM
MD
LG