Лінкі ўнівэрсальнага доступу

logo-print

На Украіне зноў патрабуюць адабраць званьне Героя. Пасьля Бандэры - Бярэсту


Прадстаўнік украінскай партыі “ Свабода” Дзьмітрый Сьнегіроў просіць суд адмяніць прысваеньне званьня "Герой Украіны" Аляксею Бярэсту, які ўзьняў чырвоны сьцяг над Рэйхстагам 30 красавіка 1945 году. Сьнегіроў падаў у Данецкі акруговы адміністрацыйны суд заяву аб адмене адпаведнага ўказу прэзыдэнта Украіны ад 6 траўня 2005 году.

Сьнегіроў абгрунтоўвае пазоў тымі ж аргумэнтамі, якія прыводзіў у сваім пазове данецкі адвакат Уладзімір Алянцэвіч ў справе ўзнагароджаньня Сьцяпана Бандеры. Па падставе пазову Алянцэвіча той жа Данецкі суд у красавіку сёлета прызнаў указ прэзыдэнта Юшчанкі аб пасьмяротным уганараваньні Бандэры незаконным і рэкамэндаваў яго адмяніць. Суд аргумэнтаваў сваё рашэньне тым, што Сьцяпан Бандэра не з’яўляўся грамадзянінам незалежнай дзяржавы Украіны , бо памёр задоўга да яе ўзьнікненьня ў эміграцыі.

Новы заяўнік Д. Сьнегіроў зьвяртае ўвагу, што і Аляксея Бярэсту тады нельга лічыць грамадзянінам Украіны, бо вэтэран вайны памёр у 1970 годзе. Раней палітвыканкам партыі “Свабода” зьвярнуў увагу на юрыдычныя і палітычныя наступствы, якія можа выклікаць адабраньне ўзнагароды ў Сьцяпана Бандэры. Тады прыйдзецца, напрыклад, адмяніць гэтыя званьні і чарнобыльскім пажарнікам, якія памерлі ад высокіх доз апраменьваньня ў 1986 годзе , а званьне Герояў атрымалі праз 20 гадоў.

Кіраўнік Луганскай арганізацыі “Свабоды” спадзяецца, што суд ня стане прымяняць двайныя стандарты ў разглядзе па сутнасьці двух iдэнтычных спраў – Бандэры і Бярэсты. Сьнегіроў падкрэсьлівае, што ён ня мае асабістых прэтэнзій да асобы памерлага вэтэрана, але закон павінен быць аднолькавым для ўсіх, незалежна ад таго, падабаецца гэта той ці іншай частцы грамадзтва.
XS
SM
MD
LG