Лінкі ўнівэрсальнага доступу

Не пажадалі быць на выбарах дэкарацыяй


Уладзімер Сякерка («Справядлівы сьвет»), Васіль Палякоў (АГП) падчас брыфінгу.

Уладзімер Сякерка («Справядлівы сьвет»), Васіль Палякоў (АГП) падчас брыфінгу.

Сёньня Гомельская абласная рада Аб’яднаных дэмакратычных сілаў прыняла рашэньне адклікаць сваіх вылучэнцаў, зарэгістраваных кандыдатамі ў дэпутаты мясцовых саветаў.


«З 295 дэмакратычных кандыдатаў, зарэгістраваных у Беларусі, — паведаміў на брыфінгу для журналістаў сябра рады АДС, старшыня Гомельскай абласной арганізацыі АГП Васіль Палякоў, — траціна, альбо 101 кандыдат, вылучаны ў саветы розных узроўняў на Гомельшчыне. Мы адклікаем сваіх прадстаўнікоў з кандыдатаў, бо не жадаем быць дэкарацыяй у гэтым выбарчым фарсе, які чамусьці называецца выбарамі».

Партыйныя прэтэндэнты на дэпутацкія мандаты адкліканы таму, што, на думку партыйных актывістаў, зьмены ў выбарчае заканадаўства ніяк не паўплывалі на рэальную арганізацыю выбараў. Улады амаль не ўключылі вылучаных прадстаўнікоў АДС у выбарчыя камісіі, і найперш ва ўчастковыя, дзе вядзецца першасны падлік галасоў. На партыйных вылучэнцаў аказваўся ціск з боку адміністрацый, асабліва ў дачыненьні тых, хто мае працу.

Цяпер дэмакратычныя прадстаўнікі застаюцца толькі працаваць у камісіях. Яны будуць працягваць весьці назіраньне за выбарчай кампаніяй і тлумачыць людзям, чаму іхнія вылучэнцы адмовіліся ад кандыдацтва.

Рашэньню рэгіянальнай рады АДС папярэднічала адмена вылучэньня кандыдатаў на паседжаньнях партыйных органаў, якія маюць на гэта права паводле выбарчага заканадаўства.

З прычыны зьняцьця з выбараў партыйных кандыдатаў яшчэ больш зьменшылася і без таго невялікая канкурэнтнасьць на выбарах. Напрыклад, большая палавіна акругаў у Гомельскі гарсавет цяпер ня мае альтэрнатыўных кандыдатаў.

У выбарчай кампаніі засталіся ўдзельнічаць ад АГП, партыі левых «Справядлівы сьвет» каля паўдзесятка кандыдатаў у дэпутаты зь ліку тых, хто вылучаўся шляхам збору подпісаў. Балятуецца на выбарах у гарсавет і 1 кандыдат ад партыі «Зялёных».

Паказаць камэнтары

XS
SM
MD
LG