Кіраўнік аргкамітэту сьвяткаваньня Дня Волі, старшыня Партыі БНФ Аляксей Янукевіч адзначае:
Арганізатары акцыі яшчэ на самым пачатку прадугледжвалі магчымасьць абазначыць яе і як сустрэчу выбарцаў з кандыдатамі ў дэпутаты сталічнага гарадзкога савету. Яны зыходзілі з таго, што менавіта 25-га сакавіка — апошні дзень рэгістрацыі прэтэндэнтаў на дэпутацкія мандаты. Аднак пытаньне ў тым, ці зарэгіструюць дэмакратычных кандыдатаў?
Першымі ў Менску пачалі рэгістрацыю сёньня ў Савецкім раёне. Тут у Лагойскай выбарчай акрузе № 44 вылучаліся былы дэпутат Палаты прадстаўнікоў, палітвязень, а цяпер беспрацоўны Сяргей Скрабец і прадстаўнік Таварыства беларускай школы Андрэй Крэчка. Абодвум адмовілі ў рэгістрацыі.
Малодшы брат Сяргея Скрабца Аляксандар прадстаўляў інтарэсы свайго брата на паседжаньні камісіі. Ён кажа, што Сяргей Скрабец перадаў у камісію 169 подпісаў.
“Камісія лічыць, што 160 подпісаў скасуюцца. Нібыта яны зьбіраліся ў дамах па-за межамі акругі. Цяпер цягам трох дзён гэтае рашэньне можна абскардзіць у гарадзкую выбарчую камісію.
Пакуль я проста не магу патлумачыць, што здарылася. Я ўпэўнены, што мы зьбіралі подпісы толькі ў тых дамах, якія ўваходзяць у межы Лагойскай акругі № 44. Будзем разьбірацца”.
У Андрэя Крэчкі, на думку камісіі, выявіліся праблемы з дэклярацыяй маёмасьці. Ён не пазначыў, што за ім дагэтуль лічыцца аўтамабіль “Жигули”, узрост якога, паводле актывіста ТБШ, — 30 гадоў.
“З трох кандыдатаў у Савецкім раёне ў нас зарэгістраваныя два. Гэта — кіраўніца “Маладых хрысьціянскіх дэмакратаў” Любоў Каменева і каардынатар праекту “Пакаяньне” Валерыя Чарнаморцава. Не зарэгістравалі, спаслаўшыся на недакладнасьці ў дэклярацыі, Рыгора Літвіна. Мы будзем абскарджваць гэтае рашэньне, паколькі ў адпаведнасьці са зьмяненьнямі ў Выбарчы кодэкс недакладнасьці ў дэклярацыі ня могуць быць падставай для нерэгістрацыі кандыдата”.
