Лінкі ўнівэрсальнага доступу

“Біпалярная капібара” – такую назву мае вэнэсуэльскі сайт палітычнай сатыры, які ўжо два гады робяць трое маладых журналістаў. Папулярнасьць сайту “Капібары” перавышае нават сайты салідных штодзённых нацыянальных выданьняў. Галоўным пэрсанажам, над якім сьмяецца “Капібара”, зьяўляецца прэзыдэнт краіны Ўга Чавэс.


Капібара – самы вялікі грызун у сьвеце. Ён вельмі распаўсюджаны ў Лацінскай Амэрыцы, ягонае мяса ўжываюць у ежу.

Але “зьесьці” сайт “Біпалярная капібара” ўладам пакуль не атрымліваецца. Рэжым Чавэса ўзмацняе ціск на мэдыі, ў гэтым месяцы ўлады зачынілі тэлеканал RCTV, які дазваляў сабе крытыкаваць прэзыдэнта, таксама былі ануляваныя ліцэнзіі ў 34 радыёстанцый па ўсёй краіне. Іншыя электронныя мэдыі атрымалі загад трансьляваць шматлікія і працяглыя прамовы прэзыдэнта.

Прэзыдэнт – галоўны герой і сюжэтаў “Біпалярнай капібары”, аднак гэта не дастаўляе задавальненьня Чавэсу. “Чавэс – майстра камунікацыі і прыроджаны комік, які не разумее, які ён сьмешны” – гаворыць Хуан Андрэас Равэль, адзін з трох уладальнікаў “Капібары”.

Ад сайту дастаецца ўсім – ня толькі самому Чавэсу, але і ягоным паплечнікам, а таксама апазыцыянэрам і замежным палітыкам.
Адным з самых папулярных сюжэтаў сайту стаў пяціхвілінны ролік“Прэзыдэнцкая выспа”пра тое, як лідэры гішпанамоўных краінаў патрапілі на бязьлюдную выспу.

У стужцы Чавэс і ягоны балівійскі калега Эво Маралес ядуць лысага амэрыканскага арла, аргентынская прэзыдэнтка Крысьціна Кіршнэр спакушае бразыльскага кіраўніка Да Сільву, а гішпанскі кароль Хуан Карлас раняе ў мора свае сківіцы. На You tube гэты ролік паглядзела 450 тысяч чалавек.

Аднак “Капібара” сьмяецца ня толькі з ўлады, але і зь яе апанэнтаў, дастаецца, ў прыватнасьці, студэнцкаму руху, актывісты якога, паводле сайту, больш любяць піць піва на беразе акіяна, чым удзельнічаць у акцыях пратэсту.

Ня раз аб’ектам крытыкі “Капібары” рабіўся нават бацька аднаго са стваральнікаў сайту Альбэрт Фрэдэрыка Равэль – жорсткі крытык рэжыму Чавэса і мэдыя- дзеяч.

“Ад нашых кпінаў не застрахаваны ніхто, нават мы самі” – кажа іншы стваральнік сайту Асвальда Гразіяні. “Наш дэвіз – кажа ён – аднабаковыя, неправераныя навіны ад грызуна з псыхічнымі праблемамі”.

"Капібара" напісала і пра Аляксандра Лукашэнку, праўда рэдактар прызнаўся, што "першапачатковым намерам гэтай нататкі было асьвятліць прыезд прэзыдэнта Беларусі Аляксандра Лукашэнкі, напісаўшы дурнаватыя жарты наконт ягонай прычоскі і глупстваў, якія верагодна скажа госьцю прэзыдэнт Чавэс. Але паглядзеўшы на гэтае фота, я спалохаўся, у мяне зьнікла жаданьне кпіць ці жартаваць наконт Лукашэнкі паколькі ён сапраўды страшна выглядае".

Аглядальнік дзяржаўнага тэлебачаньня назваў “Капібару” “антыўрадавай бандай наркаманаў”. “Дзякуй за рэкляму” – адказаў Хуан Андрэас Равэль.

Нядаўна ўлады блякавалі апазыцыйны сайт, які распаўсюдзіў несапраўдную інфармацыю пра забойства аднаго з міністраў ураду Чавэса. Гэты эпізод стаў нагодай для наступу на ўсе незалежныя інтэрнэт-мэдыі краіны. Чыноўнікі заяўляюць, што да вэб-сайтаў павінна ўжывацца такое ж рэгуляваньне, як і адносна радыё- і тэлевяшчаньня.

Раздражненьне ўладаў выклікаюць таксама сацыяльныя сеткі, такія як Twiter і Facebook. Празь іх распаўсюджваецца рэкляма незалежных выданьняў, такіх як “Капібара”. Прэзыдэнт Чавэс заклікаў сваіх суайчыньнікаў не карыстацца сацыяльнымі сеткамі.

Аднак нягледзячы на ціск і перашкоды “Біпалярная капібара” працягвае выходзіць у інтэрнэце. “Сатыра заўсёды супраціўляецца спробам падавіць яе” – гаворыць адзін са стваральнікаў сайту Хуан Андрэас Равэль, піша “The New York Times”.
XS
SM
MD
LG