Лінкі ўнівэрсальнага доступу

Зьміцер Сасноўскі — беларускі музыка, лідэр гурта сярэднявечнай музыкі «Стары Ольса», майстар і калекцыянэр старадаўніх інструмэнтаў, прадусар (акрамя «Ольсы» займаецца маладымі гуртамі свайго ўлюбёнага кірунку), рэжысэр (зьняў тры кліпы), навуковец (аўтар 13 навуковых артыкулаў), кіраўнік інфармацыйнага цэнтру ЗБС «Бацькаўшчына».



Што для вас свабода?


Магчымасьць будаваць кожны дзень паводле свайго разуменьня і ў адпаведнасьці са сваімі пачуцьцямі. У гэтым сэнсе маё ўспрыманьне свабоды амаль супадае з разуменьнем шчасьця.



Што найбольш абмяжоўвае вашу свабоду?


Вымушанасьць мірыцца з дыктатам большасьці.



Што для вас шчасьце?


Свабода ва ўсіх праявах. Нават у асабістым жыцьці. Але наконт асабістага патлумачу. У фільме «Неспрыстойная прапанова» на пачатку гучыць голас за кадрам: «Калі кахаеш нешта — адпусьці яго, і калі яно да цябе вернецца — будзе тваім назаўжды, калі не вернецца — яно не было тваім ніколі».



Чаго вы найбольш баіцеся?


Страціць пакуты творчасьці і пачуцьцё навізны.



Які талент вы хацелі б мець?


Талент тактычнага чаканьня непунктуальных, але блізькіх людзей.



Кім з сучасьнікаў вы захапляецеся?


Роберд дэ Ніро і даўнішні камандзір Мар’інагорскай брыгады палкоўнік Галадзед.



Што вы найбольш любіце рабіць?


Атрымліваць грошы за любімую і добра выкананую працу!!!



Калі б можна было пражыць жыцьцё яшчэ раз, што б вы зьмянілі?


Пасьля такога пытаньня спачатку згадалася ўся безьліч глупстваў, памылак і шалёных учынкаў, большасьць якіх зроблена пад уздзеяннем адпаведных напояў і рэчываў. Але пасьля невялікага асэнсаваньня адчуваю ўдзячнасьць лёсу, Богу і людзям за ўсё перажытае і пабачанае. Таму змяніў бы толькі адчуванне часу — не губляў бы яго на дробязі!



Якую найлепшую параду вы атрымалі?


«Свой лёс будуй сам!» і «Не затрымлівай кубак!»



Які ваш улюбёны дэвіз?


Супадае з папярэднім адказам!



У якой палітычнай сыстэме вы хацелі б жыць?


Якая пакідае дастатковае поле для працавітай рэалізацыі асабістых амбіцый. Калі я здольны «вкалываць» і ў мяне ёсmць вялікія жыцmцёвыя плzны, я не хачу дапамагаць атрымліваць стабільны аклад тым, хто працаваць нz хоча і плzнуе жыццё толькі ад пляшкі да пляшкі.



У якой краіне вы хацелі б жыць?


У Беларусі, але з прынцыпам расmсялення людей паводле культурных і жыцmцёвых прыярытэтаў. У маім двары ў цэнтры Менску рэгулярна можна бачыць карціну, як чалавек у добрым строі сядае ў добрую машыну, а праз 2 метры «сінякі» «душаць» чарговую бутэльку «чарла». У прынцыпе гэта старая мара — пабудаваць пасёлак пад Менскам, дзе б жылі выхаваныя і сmвядомыя беларусы са сваёй паліцыяй, сваёй школай і ўніверам, сваёй прэсай і сваім кабельным ТВ. І гэта нz так і складана пачаць — хаця б некалькім з нас прадаць свае кватэры, набыць за капекі на рэгіёнах драўляныя pрубы, перавезmці і сабраць. А далей — працаваць да чырвонага поту дзеля нашых дзяцей!



У якую эпоху вы хацелі б жыць?


Гісторыкі і фантасты даўно вызначылі, што мы ня здольныя нармальна жыць ні ў якай іншай эпосе, акрамя той, у якую нарадзіліся і вырасьлі.



Калі б вы сталі кіраўніком Беларусі, што б зрабілі найперш?


Культурная рэвалюцыя, побытавая фізычная культура (загартоўваньне, ёга, ушу і інш.), адкрытая спэкуляцыя на геаграфічным становішчы ў сфэры міжнароднага транзытнага гандлю, легалізацыя «чорных» капіталаў, шырокае мясцовае самакіраваньне, падтрымка гістарычнай спадчыны, найшырэйшае разьвіцьцё ўсіх відаў турызму. Нешта атрымалася шмат — нейкая перадвыбарчая праграма! Але гэта выглядае цэльна, а нейкае адно дзеяньне ня здольнае заўважна зьмяніць становішча!



Якія адносіны Беларусь павінна мець з Эўразьвязам?


Часта бываю ў краінах Еўразьвязу і ведаю «процьму» іх амаль невырашальных праблем. Таму аптымальным шлях Беларусі — добрасуседскія стасункі з Усходам і Захадам пры захаваньні свайго ўнікальнага статусу і пры дбаньні пра свае нацыянальныя беларускія «шкурныя» выгоды. Толькі паводле такіх прынцыпаў ВКЛ ганарліва пражыло пяць стагодзьдзяў.



Якія адносіны Беларусь павінна мець з Расеяй?


Такія, як і з Эўразьвязам. Наша гісторыя паказвае, што калі аддаваць перавагу аднаму з бакоў — аўтаматычна «скатваесься» ў падначаленьне да аднаго і супрацьпастаўляесься другому. МЫ гордая незалежная нейтральная дзяржава з дбаньнем толькі сваіх, а не чужых інтарэсаў. Наш шлях — мір з суседзямі і праз гэта добры бізнэс паміж імі і іхнымі рэсурсамі!



Некаторыя думаюць так: «Хай дыктатура, абы свая». А вы?


Я зусім ня супраць дыктатуры, бо мы, беларусы, па натуры поўныя балбесы і разьгільдзяі! Але я супраць дыктатуры, якая ня мае нацыянальных прыкмет і прымушае актыўных сваіх грамадзян жыць на адным узроўні з вялікім пасыўным статкам.



Калі і як у Беларусі зьменіцца ўлада?


Ну, балбесамі і разьгільдзяямі мы не перастанем быць! Здаровы жыцьцёвы «пафігізм» у нас таксама ня зьнікне, бо фарміраваўся доўгія стагодзьдзі і дапамог нам выжыць! Таму адказ тут адзін — зьменіцца ўсё імкліва і хутка, калі хаця б адно зьвяно гэтага напружанага ланцужка ня вытрымае і парвецца. І я ўжо зараз шчыра баюся тых часоў. Баюся за родных, блізкіх і сяброў, бо з нашымі недахопамі ў нацыянальным характары і многімі негатыўнымі рысымі, выхаванымі СССР і РБ, пэўна, давядзецца ўжываць здольнасьці абароны і самаабароны. Таму я толькі за мэтанакіраванае, але павольнае рэфармаваньне ўлады. Хаця, магчыма, гэта параноя!



Калі беларусы загавораць па-беларуску?


Два варыянты: ці калі ўлада «абмовіцца», ці калі мова стане моднай. Калі «ён» пачне хаця б зрэдку ўжываць родную мову — зьменіцца многае. Пры сучаснай сыстэме ўлады амаль адсутнічаюць перашкоды, каб за некалькі гадоў Беларусь стала збольшага беларускамоўнай. Гэтым ўлада толькі ўмацавала б свае пазіцыі. Чаму «ён» гэтага не разуме?! Наконт «моднага» шляху вельмі сумняваюся. Яго амаль няма каму рэалізаваць. Зусім нядаўна я безвынікова спрабаваў пераканаць знаёмага, што важней папулярызацыя мовы, чым бясконцыя зьнясільваючыя спрэчкі прафэсійна нерэалізаваных мовазнаўцаў наконт таго, які правапіс і граматыка больш адпавядае нацыянальнаму характару. Тут шмат што можна сказаць жудасна негатыўнага пра ўсіх, хто зводзіць праблему жывога грамадзкага ўжываньня мовы да навуковых спрэчак пра граматыку. У мяне складаецца ўражаньне, што гэта нейкая добра прадуманая дывэрсія — хай актыўныя беларусы лепш трацяць час на спрэчкі між сабой, чым мілагучнымі беларускімі выразамі з добрай усмешкай і пазытыўным стаўленьнем да суразмоўцы паказваюць, што карыстацца мовай можа быць прыгожа і модна!



Што будзе, калі беларусы не загавораць па-беларуску?


Як шматразова ў гісторыі — «выедзем», выжывем, «перакантуемся» на здаровым «пафігізме» да лепшых часоў! У горшым выпадку станем «аўстрыйцамі». Хаця горшага выпадку ня будзе!!!

Паказаць камэнтары

XS
SM
MD
LG