Лінкі ўнівэрсальнага доступу

19 сакавіка — пяць гадоў малітваў за вяртаньне касьцёла Сьвятога Язэпа


19 сакавіка каталіцкі касьцёл адзначае сьвята Сьвятога Язэпа. З гэтай нагоды каталікі з розных парафій Менску маліліся каля будынку касьцёла імя Сьвятога Язэпа за вяртаньне сьвятыні вернікам.

Каля ўваходу ў касьцёл сабраліся каля двух дзясяткаў вернікаў розных узростаў, якія з запаленымі сьвечкамі, ружанцамі і сьпевамі маліліся да Сьвятога Язэпа і тлумачылі сэнс малітоўнай акцыі:

«Гэта зьбіраецца моладзь, людзі сталага веку — вернікі-каталікі, проста неабыякавыя людзі — каб памаліцца за вяртаньне касьцёла Сьвятога Язэпа і кляштара бэрнардынцаў. Мы не разумеем, як можна нішчыць гісторыю і спадчыну свайго народу. Нашаму народу ўжо і так шмат дасталася за камуністычнымі часамі, калі нішчыліся сьвятыні. Пакутуем ад гэтага і зараз. І працягваць тыя ж самыя памылкі — гэта проста глупства».

За вяртаньне касьцёла Сьвятога Язэпа і кляштара бэрнардынцаў менскія каталікі пачалі маліцца 5 год таму — 19 сакавіка 2005 году. Усе гэтыя гады яны штовечар прыходзяць да касьцёла, каб памаліцца на прыступках будынку. Напачатку акцыі да людзей прыходзілі чыноўнікі гарадзкой адміністрацыі з абяцанкамі вырашыць пытаньне. Аднак і па сёньня ніякіх зрухаў з боку ўлады не адбылося.


Тым ня менш вернікі здавацца не зьбіраюцца, кажа адна з арганізатарак малітваў Івона Мацукевіч:

Мы молімся і будзем маліцца ў спадзяваньні, што Бог дапаможа нашу сьвятыню вярнуць.
«Мы молімся і будзем маліцца ў спадзяваньні, што Бог дапаможа нашу сьвятыню вярнуць. Сёньня — сьвет бязьвер’я, зла, алькагалізму — і нашая краіна не выключэньне. Таму молім аб адным: Божа, дапамажы нашаму народу ня згінуць».

Менгарвыканкам хоча пераўладкаваць кляштарныя будынкі ў гатэльна-забаўляльны комплекс. Вернікі сабралі больш за 30 тысяч подпісаў да кіраўніка краіны. Зьвярталіся яны таксама ў розныя іншыя інстанцыі, аднак станоўчага адказу так і не атрымалі.

У касьцёле па-ранейшаму месьціцца Беларускі дзяржаўны архіў-музэй літаратуры і мастацтва, а таксама архіў навукова-тэхнічнай дакумэнтацыі. Вайсковая камэндатура і пракуратура вызвалілі кляштарныя будынкі, але зараз тут распачаліся будаўнічыя працы.


Перапыніць іх ад Міністэрства культуры патрабуе старшыня Беларускага добраахвотнага таварыства аховы помнікаў гісторыі і культуры Антон Астаповіч:

«З касьцёлам больш складаная сытуацыя, бо там знаходзяцца два архівы. Але ж калі браць кляштарныя будынкі, то яны павінныя быць перададзеныя каталіцкаму касьцёлу адназначна. І тут пытаньне ня толькі маральнае і маёмаснае. Бо пакуль гэтыя будынкі на балянсе „Менскай спадчыны“ — над імі пагроза, што гэтая гісторыка-культурная каштоўнасьць будзе зьнішчаная. Бо „Менская спадчына“ не ахоўвае спадчыну. Не клапоціцца пра яе, а мэтанакіравана яе зьнішчае».
Касьцёл сьвятога Язэпа і кляштар ордэну бэрнардынцаў у Менску
…быў заснаваны ў XVII стагодзьдзі. Яны ўваходзілі ў кляштарны комплекс, дзе ў розныя гады працавала пачатковая школа, школа філязофіі, бібліятэка на паўтары тысячы тамоў. У 1863 годзе манахі-бэрнардынцы падтрымалі паўстаньне пад кіраўніцтвам Кастуся Каліноўскага. Пасьля яго здушэньня на загад Мураўёва-вешальніка ўсе яны былі гвалтоўна выселеныя ў Магілёў, а кляштар зачынены. У касьцёле некаторы час мясьцілася праваслаўная царква, а ў 1872 годзе ён быў перабудаваны пад архіў. Сёньня тут месьціцца «Архіў навукова-тэхнічнай дакумэнтацыі», а таксама «Архіў літаратуры й мастацтва Беларусі». Будынак былога кляштару да нядаўняга часу займалі вайсковая камэндатура й пракуратура. Пяць гадоў таму вернікі-каталікі пачалі вулічныя набажэнствы за вяртаньне каталіцкіх сьвятыняў. Аднак гэтае пытаньне па-ранейшаму застаецца ня вырашаным. А нядаўна ўлады распачалі працы па пераўладкаваньні кляштарнага комплексу ў забаўляльны цэнтар з гатэлем, рэстарацыямі і падземнымі гаражамі.

Паказаць камэнтары

XS
SM
MD
LG