Сёньня выканкам Фрунзэнскага раёну Менску фармаваў участковыя выбарчыя камісіі. Зьнешне ўсё выглядала прыстойна. На паседжаньне дапусьцілі журналістаў, прадстаўнікоў палітычных партый, грамадзкіх арганізацый. Сярод іх, у прыватнасьці, — руху “За свабоду” і Беларускага Хэльсынскага камітэту.
Прагучалі наступныя лічбы: усяго падалі заявы на працу ў камісіях 1781 чалавек. Зь іх зацьвердзілі — 1516. У складзе камісіяў 82% — вылучэнцы палітычных партыяў і грамадзкіх арганізацыяў. Удзельнікам паседжаньня не забаранялі задаваць пытаньні, давалі магчымасьць коратка выступіць. Праўда, прозьвішчаў тых, хто ўвайшоў у камісіі, так і не назвалі. Маўляў, цяжка зачытваць сьпіс з паўтары тысячы чалавек. Паабяцалі — прыходзьце заўтра, сьпіс будзе вывешаны, усё ўбачыце на ўласныя вочы. А сярод прэтэндэнтаў на месцы ў камісіях было шмат вядомых дэмакратычных актывістаў: Віктар Карняенка, Іна Кулей, Аляксей Кавалец, Алесь Таўстыка...
Удзельнік сёньняшняга паседжаньня Андрэй Сушко — прафэсійны юрыст, сябра руху “За свабоду” — параўноўвае атмасфэру сёлетніх і папярэдніх мясцовых выбараў. Зьнешне сёлета як быццам усё лепш, канстатуе ён:
“Паводле фармальных юрыдычных працэдураў я не заўважыў нейкіх парушэньняў. Фармальна ўсё было правільна. Улады спрабавалі ўжыць новыя нормы Выбарчага кодэксу — тое, што прадстаўнікі грамадзянскай супольнасьці і прадстаўнікі тых, хто вылучаецца кандыдатамі ў дэпутаты, могуць прысутнічаць на пасяджэньнях адміністрацыі”.
Сапраўды, раней ва ўчастковых камісіях не было столькі вылучэнцаў ад партый і грамадзянскай супольнасьці, цьвердзіць Андрэй Сушко. Аднак трэба ведаць, якія канкрэтна гэта арганізацыі, кажа юрыст:
“Бальшыню тут будуць складаць, я так думаю, “Белая Русь”, БРСМ, афіцыйныя прафсаюзы, праўладныя камуністы, лібэральна-дэмакратычная партыя. Нездарма прадстаўнік адміністрацыі ўпарта даводзіў, што прадстаўнікі некаторых партый і грамадзкіх арганізацый прыходзілі ў адміністрацыю, настойліва пераконвалі, што менавіта іх трэба ўключаць у камісіі”.
Спадар Сушко падсумоўвае:
“У рэчышчы так званай лібэралізацыі зьмянілася рыторыка, зьмяніўся зьнешні бок справы. Але далей я пакуль, на жаль, сур'ёзных зьмяненьняў ня бачу”.
У офісе руху “За свабоду” кажуць, што такія вонкавыя зьмены закранулі толькі вялікія гарады, найперш сталіцу. А на пэрыфэрыі пераважна ўсё застаецца, як і падчас папярэдняй кампаніі.
