СОНЕЧНА
...і марозна. Тэмпэратура: -16 — -4 С.
НЕ ПРАХОДЗЬЦЕ МІМА:
Праваабарончы цэнтар "Вясна" праводзіць прэзэнтацыю справаздачы аб парушэньні правоў чалавека ў Беларусі ў 2009 годзе. Менск, праспэкт Незалежнасьці, 78-А, 48. Пачатак а 13:00.
МОЖА БЫЦЬ ЦІКАВА:
Сустракаецца экспэртная польска-беларуская група для пошуку вырашэньня канфлікту вакол Саюзу палякаў Беларусі.
ТАМ, ДЗЕ НАС НЯМА:
Дэлегацыя Парлямэнцкай асамблеі АБСЭ ў Тбілісі.У Жэнэве амэрыканска-расейскія перамовы аб ядзерным раззбраеньні.
У Лёндане сусьветная прэм’ера мюзыклу Эндру-Лойд Уэбэра "Love Never Dies", які зьяўляецца працягам"Phantom of the Opera", ягонага фэнамэнальна пасьпяховага мюзыклу з 1986 году.
ТАКСАМА Ў ГЭТЫ ДЗЕНЬ:
У 1814-м у сям’і прыгонных сялянаў нарадзіўся ўкраінскі народны паэт Тарас Шаўчэнка (пам. 1861).У 1840-м нарадзіўся Францішак Багушэвіч, клясык беларускай літаратуры (пам. 1900).
У 1918-м Выканаўчы Камітэт Рады Ўсебеларускага Зьезду прымае Другую Ўстаўную Грамату. Беларусь абвяшчаецца Беларускай Народнай Рэспублікай, дэмакратычнай, парлямэнцкай і прававой дзяржавай. Заканадаўчая ўлада ў БНР перадаецца Радзе Ўсебеларускага Зьезду, а выканаўчая – Народнаму Сакратарыяту Беларусі. Абвяшчаецца нацыяналізацыя зямлі, яе нетраў, лясоў і азёр. Другая Ўстаўная Грамата яшчэ ня вызначала дакладнай тэрыторыі дзяржавы і характару дачыненьняў БНР зь іншымі дзяржавамі. Неўзабаве, 25 сакавіка 1918 году будзе прынятая Трэцяя Ўстаўная Грамата, якая канчаткова абвесьціць Беларусь незалежнай краінай.
У 1934-м нарадзіўся Юры Гагарын, першы ў сьвеце касманаўт. У космасе ён адзін раз абляцеў Зямлю і прабыў там у цэлым 108 хвілінаў – ад узьлёту да пасадкі.
ЁСЬЦЬ НАГОДА:
Сусьветны дзень ды-джэя.
МІНУС 365:
Год таму на сайце Свабоды: "У Салігорску пахавалі Яну Палякову"
ЦЫТАТА НА ПАМЯЦЬ:
"Шмат было такіх народаў, што страцілі наперш мову сваю, так як той чалавек прад скананьнем, катораму мову займе, а потым і зусім замёрлі. Не пакідайце ж мовы нашай беларускай, каб ня ўмёрлі!" — Францішак Багушэвіч. З прадмовы да паэтычнага зборніка "Дудка беларуская" (1891).
