Лінкі ўнівэрсальнага доступу

logo-print

На два дні Лукашэнка можа апынуцца ў атачэньні эўрапейскіх прэзыдэнтаў


Сустрэча Д.Грыбаўскайце і А.Лукашэнкі летась у Вільні

Сустрэча Д.Грыбаўскайце і А.Лукашэнкі летась у Вільні

Хто зь дзяржаўных кіраўнікоў прыбудзе на сьвяткаваньні ў Вільню?


Пакуль свой удзел ва ўрачыстасьцях з нагоды 20-х угодкаў аднаўленьня незалежнасьці Літвы пацьвердзілі – прэзыдэнт Латвіі Валдзіс Затлерс, Эстоніі - Тоомас Хендрык Ільвэс, Польшчы – Лех Качыньскі, Фінляндыі – Тар’я Каарын Халанэн, Славеніі - Даніла Цюрк.

У Вільню таксама прыбудуць часовы выканаўца абавязкаў прэзыдэнта Малдовы Міхай Гімну, сьпікер парлямэнту Грузіі Давід Бакрадзэ, кіраўнік рыксдагу Швэцыі Пэр Вэстэрбэрг.

Паводле літоўскіх СМІ, вельмі верагодна, што ў сьвяткаваньняў будзе ўдзельнічаць і новаабраны прэзыдэнт Украіны Віктар Януковіч. Аднак, пакуль ён не пацьвердзіў, што прыбудзе ў Вільню.

8 сакавіка ў Літве чакаюць, што афіцыйны Менск адкажа на запрашэньне, якое прэзыдэнт Літвы Даля Грыбаўскайце даслала Аляксандру Лукашэнку. Літоўскія дыпляматы ўжо перадалі Лукашэнку гэтае запрашэньне.

На сьвяткаваньне таксама запрасілі і прэзыдэнта Расеі Дзьмітрыя Мядзьведзева. Ён, аднак, паведаміў, што ня зможа прыбыць у Вільню ў сувязі з удзелам у іншых мерапрыемствах.

Запрашэньні Мядзьведзева і Лукашэнкі на Дзень незалежнасьці Літвы выклікалі крытыку з боку некаторых палітыкаў і грамадзкіх дзеячаў.

Як падаюць літоўскія мэдыі на урачыстасьці, прымеркаваныя да 20-х угодкаў аднаўленьня незалежнасьці Літвы, большасьць з запрошаных замежных дэлегацыяў прыбудуць 10 сакавіка. На вечар гэтага дня ў Вільні заплянаваныя першыя сьвяточныя мерапрыемствы.

Асноўныя ўрачыстасьці адбудуцца 11 сакавіка.

Паказаць камэнтары

XS
SM
MD
LG