Лінкі ўнівэрсальнага доступу

logo-print

Лідэр руху “За свабоду” Аляксандар Мілінкевіч і лідэр неафіцыйнага Саюзу палякаў Анжаліка Борыс сустрэліся з прадстаўнікамі найбуйнейшых фракцыяў Эўрапарлямэнту. У Эўрапарлямэнце пройдуць дэбаты па Беларусі, а 25 лютага дэлегацыя эўрапарлямэнтароў на чале са старшынём дэлегацыі Эўрапарлямэнту ў “Эўранэсьце”, баўгарскім дэпутатам Крыстыянам Вігеніным накіроўваецца ў Менск.

Сустрэчы адбыліся ў фракцыях Эўрапейскай народнай партыі і сацыялістаў. Паводле памочніка Аляксандра Мілінкевіча Алеся Лагвінца, эўрапарлямэнтары выказалі падтрымку дэмакратычным працэсам і сваю прыхільнасьць фундамэнтальным прынцыпам. Яны адзначылі, што ня будзе ніякіх кампрамісаў у тым, што тычыцца дэмакратыі і правоў чалавека. Спадар Мілінкевіч адзначыў, што выступы ў фракцыях мелі вялікае значэньне:
кампрамісы — гэта выдатная дыпляматычная рэч, але не ў галіне правоў чалавека ...

“Вядома, што ў сацыялістаў погляд на дыялёг часта адрозьніваецца ад Эўрапейскай народнай партыі. Яны за большыя кампрамісы, за тое, каб праводзіць дыялёг найперш у эканамічнай сфэры. Але я думаю, што мне ўдалося іх пераканаць сёньня, і пра гэта сказала кіраўніцтва фракцыі сацыялістаў, што кампрамісы — гэта выдатная дыпляматычная рэч, але не ў галіне правоў чалавека. Яны сказалі, што будуць падтрымліваць грамадзянскую супольнасьць у Беларусі ў яе барацьбе за палітычныя і грамадзянскія свабоды. Я ўсьцешаны тым, што калі гэтыя дзьве фракцыі будуць на нашым баку, то нам будзе лягчэй пры такіх партнэрах адстойваць дарогу да эўрапейскіх стандартаў”.

Як паведамілі ў прэсавай службе Эўрапарлямэнту, сёньня эўрапарлямэнтары плянуюць правесьці дэбаты па сытуацыі ў Беларусі, а рэзалюцыю яны прымуць у сакавіку. Гэта адбудзецца пасьля візыту ў Менск дэлегацыі Эўрапарлямэнту. Яна правядзе сустрэчы з прадстаўнікамі афіцыйнага Менску, апазыцыі, грамадзянскай супольнасьці і журналістамі. Эўрапарлямэнтары падрыхтуюць справаздачу аб сытуацыі ў краіне. Аднак які сэнс у дэбатах без рэзалюцыі? Сябра дэлегацыі, эўрадэпутат Юстас Палецкіс адзначыў:

Юстас Палецкіс
“Сэнс у тым, што ня варта бразгаць дзьвярыма перад візытам гэтай дэлегацыі, што трэба стварыць магчымасьці для дыялёгу як з апазыцыяй, няўрадавымі арганізацыямі, незалежнымі журналістамі, так і з афіцыйнай уладай. Будуць сустрэчы на высокім узроўні. І пасьля гэтага ўжо не сьпяшаючыся, не па гарачых сьлядах прымаць нейкія рашэньні на паперы. У любым выпадку гэтыя высновы і ўражаньні, якія прывязе дэлегацыя, будуць мець важнае значэньне прынамсі для пазыцыі парлямэнту. І, канечне, непазьбежна будуць мець значэньне і маючыя адбыцца выбары ў мясцовыя органы ўлады”.

Паводле спадара Палецкіса, сустрэча з кіраўніком Беларусі Аляксандрам Лукашэнкам наўрад ці адбудзецца, але будуць іншыя сустрэчы “на высокім узроўні”.

“Зыходзячы з таго, што Эўрапарлямэнт усё ж не прызнае абраны цяпер парлямэнт Беларусі, у нас у гэтым сэнсе зьвязаныя рукі. Ня будзе так, як бывае, калі прыяжджаеш ва Ўкраіну, Расею ці Малдову, дзе праходзяць афіцыйныя сустрэчы ў парлямэнце і гэтак далей”.

Анжаліка Борыс, якая таксама бярэ ўдзел у сустрэчах з эўрапарлямэнтарамі ў Брусэлі, распавяла пра сытуацыю вакол польскай меншасьці. Яна адзначыла, што тут няма этнічнага канфлікту, а ёсьць парушэньне правоў.
Калі ўлады нешта хочуць ад Эўразьвязу, то яны павінны падтрымліваць тыя стандарты, на якіх трымаецца Эўропа ...

“Вырашэньне канфлікту вельмі простае. Ніхто ж не за тое, каб не размаўляць, уводзіць нейкія санкцыі. Для мяне важна, каб была спрошчаная працэдура для грамадзянаў Беларусі, каб яны маглі паехаць у Эўразьвяз, каб улады далі магчымасьць усім арганізацыям, і таксама польскай меншасьці, аб’ядноўвацца, функцыянаваць, нармальна іх зарэгістравалі. Калі ўлады нешта хочуць ад Эўразьвязу, то яны павінны падтрымліваць тыя стандарты, на якіх трымаецца Эўропа”.

Ваша меркаваньне

Паказаць камэнтары

XS
SM
MD
LG