Супрацоўнікі калёніі адмовіліся прыняць ад яе перадачу, патлумачыўшы, што Арцём Дубскі ад 10 лютага на 15 сутак пераведзены ў штрафны ізалятар.
Алена Дубская даведалася, што Арцёма абвінавацілі ў тым, што аднойчы ён ня ветліва павітаўся зь кімсьці з супрацоўнікаў калёніі, а таксама пачаў збор падпісаў сукамэнікаў пад патрабаваньнем палепшыць умовы ўтрыманьня ў калёніі.
Цягам 15 сутак Арцём Дубскі ў адзіночнай камэры будзе пазбаўлены шпацыру, магчымасьці атрымліваць лісты, пошту, мець спатканьні.
Арцёма Дубскага пакаралі зьняволеньнем за парушэньне правілаў адбыцьця пакараньня ў “справе 14-ці”. Падставай стала тое, што хлопец самавольна зьехаў ва Ўкраіну. Яго затрымалі летась 13 лютага, калі ён ехаў, каб удзельнічаць у сьвяточнай акцыі ў дзень сьвятога Валянціна.
Адвакатка Арцёма Дубскага Тамара Сідарэнка будзе абскарджваць пакараньне свайго падабароннага. Паводле праваабаронцаў, 15 сутак у штрафным ізалятары гэта даволі суровая мера для й без таго зьняволенага чалавека.
