Сустаршыня аргкамітэту дзеля стварэньня БХД Павал Севярынец паведаміў “Свабодзе”, камэнтуючы прысуд, што, магчыма, заснавальнікі пойдуць яшчэ на адзін, трэці па ліку, устаноўчы сход. Ён можа адбыцца ў красавіку-траўні.
У залі суду прысутнічалі прадстаўнікі амбасадаў ЗША, Нямеччыны. Сустаршыні БХД абураліся, што іх не прапусьцілі ў судовую залю, хоць яны не спазьніліся, а прыйшлі за дзьве хвіліны да пачатку.
Cустаршыня аргкамітэту БХД Павал Севярынец пракамэнтаваў адмову Вярхоўнага суду:
“Прысуд палітычны. Вярхоўны суд і Міністэрства юстыцыі, як і органы міліцыі, зьяўляюцца прываднымі пасамі дзяржаўнай машыны. Сёньняшні рэжым баіцца Беларускай хрысьціянскай дэмакратыі. Літаральна гадзіну таму мы прэзэнтавалі сьпіс кандыдатаў у дэпутаты на мясцовыя выбары ад БХД прыкладна з 200 асобаў. Не прайшло й году ад стварэньня партыі, а ў нас ужо адзін з самых вялікіх сьпісаў. Гэта палохае ўлады, і таму прысуд быў прадказальны”.
