Лінкі ўнівэрсальнага доступу

На працягу многіх гадоў людзям са зношанымі каленямі раілі пачакаць як мага даўжэй, перш чым ісьці на апэрацыю па іх замене. Словам, пачакайце, пакуль будзеце старэйшыя, і сустаў перажыве вас. Пра найноўшыя дасьледаваньні піша The New York Times.


Экспэрты прыходзяць да высновы, што дактары і пацыенты занадта перавышаюць ліміты жыцьцяздольнасьці зношаных суставаў. Сучасныя ўдасканаленыя тэхналёгіі штучных суставаў і хірургічных мэтадаў між тым азначаюць, што ўжыўленьне штучных суставаў будзе працягвацца даўжэй, чым некалі раней – 20 гадоў і болей. Прытым дактары па-ранейшаму раяць кандыдатам на замену пачакаць аж “пакуль вы ня зможаце цярпець”. У выніку многія пацыенты чакаюць, пакуль храсток у іх каленях зносіцца цалкам і іх хада будзе выклікаць балючае скрыгатаньне косьці аб косьць.

Пацыенты, якія чакаюць занадта доўга, бываюць настолькі аслабленымі, што аднаўленьне функцыяў суставаў бывае цяжэйшым і не заўсёды поўным. Ёсьць пэўны пункт, перачакаўшы які, вы зьмяншаеце магчымасьць аднаўленьня, кажа доктар Лін Снайдэр- Маклер, прафэсар катэдры фізіятэрапіі ва ўнівэрсытэце Дэлавэр у ЗША.

Прыкладна кожны пяты з дарослых мае артрыт або хранічныя болі ў суставах. Істотным фактарам тут зьяўляецца спадчыннасьць або павышаная вага. Але ня кожны сустаў з артрытам непазьбежна чакае замена. Лячэньне болю і запаленьня на раньняй стадыі можа людзям дапамагчы захаваць функцыю даўжэй. Дапамагаюць таксама ўмераныя фізычныя нагрузкі і падтрыманьне здаровай вагі.

Паводле публікацыі у часопісе Канадзкай мэдычнай асацыяцыі, дактары часьцей рэкамэндуюць хірургію калена мужчынам, чым жанчынам. Верагодна, адна з прычынаў ў тым, што статыстычна жанчыны жывуць даўжэй за мужчын. Так, дасьледчыкі унівэрсытэту ў Таронта выбралі мужчыну і жанчыну аднаго веку – 67 гадоў і з аднолькавым узроўнем каленнага артрыту. Яны прайшлі кансультацыі у 29 артапэдаў і 38 сямейных урачоў. Дзьве траціны зь іх рэкамэндавалі замяніць калена мужчыну, і толькі траціна палічыла неабходнай гэтую апэрацыю для жанчыны.

Крэйг Мэйсан са штату Каліфорнія ў ЗША, якой 65 гадоў, таксама доўга настойвала на апэрацыі. Калі яна магла хадзіць толькі з дапамогай мыліцаў, доктар усё яшчэ яе адгаворваў. Апэрацыю ўрэшце прыйшлося зрабіць. Жанчына згадвае, што працэс рэабілітацыі быў балючы. Але, адрозна ад хранічных боляў, якія яна цярпела ў калене, боль пасьля хірургічнага ўмяшаньня паступова зьнік. Гэта як боль родаў – на яго хутка забываесься, кажа жанчына.




  • 16x9 Image

    Алена Ціхановіч

    Родам з Койданава, ці Дзяржынску. У раньнія 90-я пачала супрацоўніць са «Свабодай», вэтэраны якой абралі яе пазьней «голасам радыё».

XS
SM
MD
LG