Лінкі ўнівэрсальнага доступу

Магілёўскі суд не падтрымаў прэтэнзіі руху БНФ “Адраджэньне”


Зьміцер Салаўёў

Зьміцер Салаўёў

Магілёўскі абласны суд не задаволіў скаргу рады абласной арганізацыі руху БНФ «Адраджэньне». Апазыцыянэры прасілі адмяніць пастанову Магілёўскага гарвыканкаму і прэзыдыюму гарсавету, якія не ўключылі ў склад магілёўскай гарадзкой выбарчай камісіі іхнага прадстаўніка — актывіста Свабоднага прафсаюзу Беларускага Сяргея Фаміна.

Зацьвярджаць Сяргея Фаміна ў складзе камісіі гарвыканкам і прэзыдыюм гарсавету адмовіліся, бо абласная арганізацыя, паводле іх, ня можа вылучаць сваіх прадстаўнікоў у гарадзкія камісіі, а толькі ў абласныя. З такой пазыцыяй рада абласной арганізацыі руху «БНФ Адраджэньне» не пагадзілася і зьвярнулася ў суд.

На разглядзе скаргі самога вылучэнца Сяргея Фаміна не было. Ён у бальніцы. Яго інтарэсы на судзе прадстаўляў старшыня магілёўскай абласной арганізацыі руху БНФ «Адраджэньне» Зьміцер Салаўёў. Суду ён намагаўся давесьці, што пастанова гарвыканкаму й прэзыдыюму гарсавету — палітычна матываваная.

«Была парушаная працэдура выбарнасьці на сумесным паседжаньні. Менавіта па тых кандыдатурах, якія вылучаліся ў склад камісіі апазыцыйнымі арганізацыямі, па іх не было галасаваньня. Паколькі ўжо
Ніякім чынам нельга лічыць гэтыя выбары нават напаўпразрыстымі.
на першых этапах ідуць фальшаваньні й падтасоўкі, то ясна, што на ніжэйшых узроўнях будзе яшчэ горш. Ніякім чынам нельга лічыць гэтыя выбары нават напаўпразрыстымі», — адзначыў пасьля суду Зьміцер Салаўёў.

Гэта ж ён казаў і на самім судзе. У сваіх довадах Салаўёў спасылаўся на камэнтары і інтэрвію сябраў цэнтральнай выбарчай камісіі Беларусі і Аляксандра Лукашэнкі з запэўніваньнямі наконт адкрытасьці і празрыстасьці выбарчага працэсу.

Прадстаўнік гарвыканкаму і гарсавету Міхаіл Сьвірыдзенка назваў скаргу неабгрунтаванай. Ён заявіў, што ўсё адбылося згодна з Выбарчым кодэксам. Паводле Сьвірыдзенкі, 38 працэнтаў складу камісіі — гэта прадстаўнікі грамадзкіх арганізацыяў: БРСМ, «Белай Русі», «Беларускага саюзу вэтэранаў вайны ў Аўганістане» ды іншых. Склад камісіі, заявіў у судзе Сьвірыдзенка, падбіралі паводле прафэсійных якасьцяў.

«Мы палічылі, што вы не адпавядаеце патрабаваньням выбарчага кодэксу», — так патлумачыў прычыну негаласаваньня па кандыдатуры Фаміна Міхаіл Сьвірыдзенка.

Судзьдзя Любоў Халадцова пасьля паўгадзіннага перапынку зачытала свой вырак.

«Адмовіць радзе абласной арганізацыі руху БНФ „Адраджэньне“ ў задавальненьні скаргі. Рашэньне суду зьяўляецца канчатковым і абскарджаньню, апратэставаньню ў касацыйным парадку не падлягае».

Абласная арганізацыя руху БНФ «Адраджэньне» вылучала ў склад тэрытарыяльных выбарчых камісіяў на Магілёўшчыне трох сваіх прадстаўнікоў. Усім ім адмовілі на той падставе, што нібыта была парушана працэдура вылучэньня кандыдатаў.

Паказаць камэнтары

XS
SM
MD
LG