Лінкі ўнівэрсальнага доступу

“Вялікая клякса на празрыстасьці выбараў”


Андрэй Толчын

Андрэй Толчын

Сёньня судзьдзя Цэнтральнага раёну Гомеля Сяргей Шыцікаў адхіліў пазоў старшыні гарадзкой арганізацыі Аб’яднанай грамадзянскай партыі Андрэя Толчына да прэзыдыюму гарадзкога савету й гарвыканкаму наконт складу гарадзкой выбарчай камісіі.

Толчын: «У практыцы судоў яшчэ не было такога, каб нейкія рашэньні выканкаму па пазовах прадстаўнікоў апазыцыі былі адменены. Заўсёды суд прымаў бок улады. Ірына Раманюк, прадстаўніца органаў, якія сфармавалі гарадзкую выбарчую камісію, не хацеўшы таго, сама сказала, што яны галасавалі за прозьвішчы, якія былі прызначаныя. Гэтым сказана ўсё. І калі глядзець па сутнасьці, то склад камісіі аказаўся вельмі дзіўным. Туды ўвайшлі і артадаксальныя камуністы, і аўганцы, і нават нейкія прадстаўнікі экзатычнага гарадзкога аддзяленьня „Беларускага казацтва“, пра якое ніхто толкам ня ведае, што гэта за ўтварэньне такое».

Гарадзкая арганізацыя АГП лічыць, што адмова ўключыць у склад камісіі яе вылучэнца, былога дэпутата Вярхоўнага Савету СССР Юрыя Варонежцава, парушае правы партыі як палітычнага суб’екта на ўдзел у выбарах. Да таго ж падчас фармаваньня камісіі не абмяркоўваліся дзелавыя якасьці прэтэндэнтаў. Таму рашэньне гарадзкіх уладаў наконт складу камісіі й трэба адмяніць.

Ірына Раманюк, якая прадстаўляла ў судзе гарвыканкам і прэзыдыюм гарсавету (яна, дарэчы, таксама ўключана ў гарадзкую выбарчую камісію), пазоў АГП не прызнала. Патлумачыла, што склад камісіі фармаваўся настолькі дэмакратычна, што ёй нават невядома, «якія органы разглядаюць такія справы больш дэмакратычна». Дзелавыя ж якасьці вылучэнцаў не абмяркоўваліся таму, што гэтага не патрабуе выбарчае заканадаўства.

Раманюк: «Магчыма, пытаньне не ў выканаўчай уладзе, якая ўпарта ня хоча бачыць прадстаўніка АГП. А ці нельга партыі задумацца: магчыма, іншых прадстаўнікоў трэба партыі вылучаць, каб яны ўвайшлі ў склад выбарчай камісіі?»

Спадарыня Раманюк паведаміла таксама, што за кожнага з 25 прэтэндэнтаў у выбарчую камісію галасавалі паасобку — працэдура фармаваньня выбарчай камісіі ніякім чынам не парушана.

Як бачна па выраку, такога ж меркаваньня трымаецца й суд.

Леанід Судаленка
Прадстаўнік гарадзкой арганізацыі АГП у судзе, юрыст Леанід Судаленка лічыць, што ўжо на першым этапе выбарчага працэсу гомельскія ўлады паставілі вялікую кляксу ў справе празрыстасьці выбараў:

«Парушана галоўнае права нашай дэмакратычнай палітычнай партыі — прымаць удзел у палітычнай кампаніі пад назвай „мясцовыя выбары“. Гэтым самым пастаўлена вялікая клякса ня толькі на новай рэдакцыі Выбарчага кодэксу, але й на лібэралізацыі выбарчага працэсу й празрыстасьці выбараў».
XS
SM
MD
LG