Што для вас свабода?
Свабода для мяне – гэта магчымасьць свабодна думаць і свабодна працаваць.
Што найбольш абмяжоўвае вашу свабоду?
Маю свабоду абмяжоўваю я сам – ведаю свае межы, стараюся за іх не выходзіць.
Што для вас шчасьце?
Маё шчасьце – гэта шчасьце маёй сям’і і маёй Беларусі. Калі яны шчасьлівыя – шчасьлівы і я.
Чаго вы найбольш баіцеся?
Я баюся толькі раптоўнай сьмерці. Больш нічога.
Які талент вы хацелі б мець?
Мне хапае і тых талентаў, якія даў мне Бог.
Кім з сучасьнікаў вы захапляецеся?
Не захапляюся нікім. Бог навучаў: “Не стварай сабе куміра”.
Што вы найбольш любіце рабіць?
Люблю чытаць гістарычныя даведнікі і пісаць свае творы.
Калі б можна было пражыць жыцьцё яшчэ раз, што б вы зьмянілі?
Я хацеў бы жыць у лясным маёнтку ў часы ВКЛ. Але гэта немагчыма. Сваё жыцьцё я б не зьмяняў.
Якую найлепшую параду вы атрымалі?
Лёсавызначальных парадаў не памятаю.
Які ваш улюбёны дэвіз?
Будзь верны самому сабе!
У якой палітычнай сыстэме вы хацелі б жыць?
У дэмакратычнай. Адзін чалавек, які б ён ні быў геніяльны, ня мае маральнага права кіраваць усім народам. Толькі калектыўнае кіраваньне!
У якой краіне вы хацелі б жыць?
Я хацеў бы жыць у Шатляндыі і слухаць пошум Гальфстрыму.
У якую эпоху вы хацелі б жыць?
У эпоху ВКЛ.
Калі б вы сталі кіраўніком Беларусі, што б зрабілі найперш?
Я паехаў бы ў Курапаты і пакланіўся сьвятым крыжам, пад якімі ляжаць беларускія людзі.
Якія адносіны Беларусь павінна мець з Эўразьвязам?
Самыя шчыльныя.
Якія адносіны Беларусь павінна мець з Расеяй?
Партнэрскія і добрасуседзкія. Але не адносіны палахлівага трусіка з імпэрскім удавам.
Некаторыя думаюць так: “Хай дыктатура, абы свая”. А Вы?
Я супраць любой дыктатуры.
Калі і як у Беларусі зьменіцца ўлада?
Ня ведаю калі, але абавязкова зьменіцца.
Калі беларусы загавораць па-беларуску?
Яны ўжо сёньня гавораць. Трэба чуць сэрцам, а ня вухам.
Што будзе, калі беларусы не загавораць па-беларуску?
Загавораць. Нічога страшнага няма. Улада загаворыць, моладзь загаворыць. А мы і сёньня па-беларуску гаворым.
