Лінкі ўнівэрсальнага доступу

Журналіст, мэнэджэр культуры, палітык. Нарадзіўся 26 сакавіка 1988 года ў Менску. Скончыў Беларускі гуманітарны ліцэй імя Якуба Коласа – ужо ў падпольлі. Вучыўся ў БДУ на факультэце журналістыкі, у ЭГУ. За палітычную дзейнасьць выключаны з унівэрсытэту і гвалтам, у кайданках, забраны ў войска, нягледзячы на ранейшае рашэньне аб непрыдатнасьці па здароўі. Праходзіць тэрміновую службу ў частцы супрацьпаветранай абароны ў Мазыры.


Што для вас свабода?

Свабода – гэта магчымасьць самастойна вырашаць, што для цябе лепш. І ня шкодзіць пры гэтым іншым.


Што найбольш абмяжоўвае вашу свабоду?

Гэта процьма начальнікаў і чыноўнікаў. Дурныя законы, а таксама добрыя законы, якія, на жаль, не выконваюцца.


Што для вас шчасьце?

Шчасьце ёсьць посьпех..


Чаго вы найбольш баіцеся?

Найбольш баюся рана памерці і не пасьпець зрабіць тое, чаго наплянаваў на два жыцьця наперад.


Які талент вы хацелі б мець?

Чытаць думкі людзей.


Кім з сучасьнікаў вы захапляецеся?

З моладзі – гэта былы палітсалдат і мой сябар Зьміцер Жалізьнічэнка. З палітыкаў – швэдзкі прэм'ер-міністар Фрыдрых Райнфэльд і чэскі палітык Вацлаў Гавэл. З журналістаў – Сьвятлана Калінкіна і Адам Міхнік. З творцаў – Аляксей Марачкін і Міхал Амнепадыстаў. Ну і найбольшым аўтарытэтам для мяне з'яўляецца кіраўнічка беларускай дыяспары Івонка Сурвілла.


Што вы найбольш любіце рабіць?

Адзначаць Купальле, падпісваць калядныя паштоўкі, сьпяваць беларускія песьні, марыць, прыдумляць слёганы, фатаграфаваць.


Калі б можна было пражыць жыцьцё яшчэ раз, што б вы зьмянілі?

Быў бы больш уважлівы да блізкіх і асьцярожны ў стасунках. Таксама менш бы спаў і больш бы рабіў.


Якую найлепшую параду вы атрымалі?

Ад свайго камбата – "Будзь хітрэйшы!".


Які ваш улюбёны дэвіз?

"Прарвемся!"


У якой палітычнай сыстэме вы хацелі б жыць?

Дэмакратычная, парлямэнцкая рэспубліка.


У якой краіне вы хацелі б жыць?

У БНР.


У якую эпоху вы хацелі б жыць?

У гэтую.


Калі б вы сталі кіраўніком Беларусі, што б зрабілі найперш?

Скасаваў бы вынікі рэфэрэндумаў 1995, 1996, 2004 гг. як нелегітымныя, надаў бы больш паўнамоцтваў парлямэнту, правёў бы свабодныя выбары, прыватызаваў бы СМІ. А таксама заняўся б ўмацаваньнем беларускага войска і перавёў бы яго на кантракт.


Якія адносіны Беларусь павінна мець з Эўразьвязам?

Беларусь павінна ўступіць у Эўрапейскі Зьвяз, НАТО, Усясьветную гандлёвую арганізацыю.


Якія адносіны Беларусь павінна мець з Расеяй?

Прагматычна-асьцярожныя.


Некаторыя думаюць так: “Хай дыктатура, абы свая”. А Вы?

Любая дыктатура – гэта гвалт над асобай, а то і над народам. І няважна, свая яна ці чужая.


Калі і як у Беларусі зьменіцца ўлада?

У 2011-ым. Гэта будзе народная рэвалюцыя, падтрыманая блізкім атачэньнем самі ведаеце каго. .


Калі беларусы загавораць па-беларуску?

Ужо гавораць. У маёй часьці салдаты ня толькі гавораць, але і чытаюць кніжкі па-беларуску. А калі загавораць улады і тэлевізар -- загавораць і ўсе.


Што будзе, калі беларусы не загавораць па-беларуску?

Так мы і застанемся малой нацыяй з правінцыйнымі комплексамі.

Паказаць камэнтары

XS
SM
MD
LG