Лінкі ўнівэрсальнага доступу

Прадстаўнік ЗША: Няма падставаў для скасаваньня санкцыяў


Майкл Скэнлан

Майкл Скэнлан

Прычыны, што прывялі да ўвядзеньня санкцый ЗША супраць Беларусі, застаюцца. Аб гэтым ў інтэрвію “Нашай ніве” заявіў часовы павераны ў справах ЗША ў Беларусі Майкл Скэнлан.


“Санкцыі прывязаныя да сытуацыі з правамі чалавека, выбарамі, свабодай СМІ. Статус кво спараджае статус кво. І калі гэтыя зьявы не зьменяцца, то санкцыі таксама не будуць зьнятыя. Пытаньне санкцый закранае многа сфэраў. І гэта азначае, што трэба вырашаць пытаньні з правамі чалавека, з незалежнымі мэдыямі, выбарамі.

Мы віталі той факт, што вясной 2009 года беларускі ўрад уключыўся ў абмеркаваньне зьменаў у выбарчае заканадаўства з Бюро па дэмакратычных інстытутах і правах чалавека АБСЭ. Але мы шкадуем, што з таго часу гэты працэс не праходзіў адкрыта і празрыста, каб грамадзтва таксама было ўключанае ў абмеркаваньне.

Яшчэ адно пытаньне — гэта артыкул 193.1 Крымінальнага кодэкса "Дзейнасьць ад імя незарэгістраванай арганізацыі". Нават кіраўніцтва Беларусі кажа, што трэба нешта зьмяняць, але зьменаў няма. Не рэгіструюцца палітычныя партыі, з праблемамі сутыкаюцца недзяржаўныя арганізацыі.

Мы з задавальненьнем успрынялі той факт, што ў 2008 годзе дзьве незалежныя газэты атрымалі доступ да афіцыйнай сыстэмы распаўсюду, але яшчэ 12 выданьняў такой магчымасьці не маюць. Мы вітаем ужо зробленае, і гэта адлюстроўваецца ў нашых рашэньнях у адказ. Маецца на ўвазе, што пасьля вызваленьня палітвязьняў мы прыпынілі санкцыі супраць двух прадпрыемстваў "Белнафтахіма",-- заявіў Майкл Скэнлан.

Адначасова ён зазначыў, што пазытыўна глядзяць на магчымасьць працягу дапамогі Беларусі Міжнародным валютным фондам пасьля красавіка 2010 года, калі будзе завершаная праграма stand by.
XS
SM
MD
LG