Лінкі ўнівэрсальнага доступу

Дэпутаты пагадзіліся з новымі правіламі праслухоўваньня тэлефонаў


Сёньня дэпутаты Палаты прадстаўнікоў прынялі ў другім чытаньні зьмены і дапаўненьні ў некаторыя законы, што тычацца ўзмацненьня барацьбы са злачыннасьцю.

Падчас абмеркаваньня гэтага дакумэнту ў першым чытаньні 4 сьнежня ў дэпутатаў узьніклі пэўныя сумневы, паколькі Закон дазваляе старшыні КДБ Беларусі, міністру унутраных спраў і кіраўніку дэпартамэнту фінансавых расьсьледаваньняў без санкцыі пракурора праводзіць ператрусы, праслухоўваньне тэлефонаў і гэтак далей. Старшыня Камісіі па нацыянальнай бясьпецы Палаты Прадстаўнікоў Віктар Гумінскі казаў, што гэтыя сумневы былі зьнятыя на пашыраным паседжаньні Камісіі са спэцыялістамі ў галіне барацьбы са злачыннасьцю. Гэтае паседжаньне адбылося паміж разглядам дакумэнтаў у першым і другім чытаньні. Магчыма, таму ніякіх прапаноў ад дэпутатаў пасьля першага чытаньня, сказаў спадар Гумінскі – не паступала.

Пасьля таго як усе 97 дэпутатаў, якія ўдзельнічалі ў галасаваньні, выказаліся за прыняцьце гэтага дакумэнту, старшыня Палаты прадстаўнікоў Уладзімер Андрэйчанка сказаў, што гэты закон выклікаў неадназначную рэакцыю ў грамадзтве.

Таму ён прапанаваў праз нейкі час прааналізаваць выкананьне гэтага дакумэнта. “Трэба будзе паглядзець, колькі такіх дакумэнтаў падпісалі старшыня КДБ, міністар унутраных спраў, кіраўнік дэпартамэнту фінансавых расьсьледаваньняў”.

Паказаць камэнтары

XS
SM
MD
LG