Лінкі ўнівэрсальнага доступу

Група беларускіх праваабаронцаў перадала ў адміністрацыю Аляксандра Лукашэнкі пэтыцыю з заклікам адмяніць сьмяротнае пакараньне, падпісаную вядомымі ў Беларусі асобамі.


Зварот з заклікам адмяніць сьмяротнае пакараньне падпісалі экс-сьпікер Мечыслаў Грыб, народная артыстка Зінаіда Бандарэнка, пісьменьнік Уладзімер Арлоў ды яшчэ 31 вядомая ў Беларусі асоба. Гэты зварот праваабаронцы сёньня ўласнаручна аднесьлі ў адміністрацыю прэзыдэнта. Праваабаронца Ірына Тоўсьцік патлумачыла “Свабодзе” мэту акцыі:

“Мы спадзяемся, што ўсё ж улады прыслухаюцца і ўвядуць мараторый на сьмяротнае пакараньне ў бліжэйшы час. А пасьля ўвогуле гэты бязьлітасны і варварскі ў 21-м стагодзьдзі від пакараньня будзе адменены”.

Праваабаронцы аднесьлі зварот у прыёмную прэзыдэнта Рэспублікі Беларусь і перадалі супрацоўніку гэтай службы. Міліцыянты, якія ахоўваюць будынак адміністрацыі Лукашэнкі, праваабаронцам не заміналі, але журналістам забаранілі здымаць падзеі на фоне будынка адміністрацыі і прымусілі сьцерці здымкі, на якіх будынак патрапіў.



Пасьля гэтага праваабаронцы рушылі на праспэкт Незалежнасьці, дзе каля ГУМу раздавалі мінакам друкаваны матэрыял супроць сьмяротнай кары. Тут перашкод з боку праваахоўных органаў таксама не было.

Далей у праграме Дня правоў чалавека была вандроўка па горадзе на трамваі, падчас якой плянавалася весьці з пасажырамі на прыпынках размовы адносна неабходнасьці адмены сьмяротнага пакараньня. Аднак з арэндай трамвая ў апошні момант узьніклі невырашальныя праблемы, распавёў праваабаронца БХК Гары Паганяйла прыблізна а 15 гадзіне дня:

“Зараз мы стаім на прыпынку “Дружная” і чакаем аўтобуса. Трамвай неяк раптоўна “зьнік”, нам у апошні момант адмовілі ў арэндзе. Таму мы пераарыентаваліся на аўтобус і чакаем, калі ён прыедзе. А тут ужо стаіць маёр КДБ, які раней вымаў у нас аргтэхніку з офісу, ёсьць прадстаўнікі РАУС, назіраюць, але пакуль ніякіх дзеяньняў зь іх боку няма”.

Цяпер у чаканьні сьмяротнага пакараньня ў вязьніцы на Валадарскага знаходзяцца Васіль Юзэпчук і Андрэй Жук. Праваабаронца Ірына Тоўсьцік — пра іх справы:

“Яны цяпер чакаюць разгляду прашэньняў аб памілаваньні ў камісіі па памілаваньні. Таксама ідзе камунікацыя наконт іх зь дзяржавай, бо пададзеныя ад іх звароты ў камітэт правоў чалавека ў ААН. Адтуль ва ўрад накіраваныя просьбы не выконваць сьмяротныя прысуды да разгляду іх зваротаў у камітэце ААН. Цяпер напружаны момант чаканьня”.

Аўтобус, на якім праваабаронцы зьбіраліся езьдзіць па Менску і агітаваць супраць сьмяротнага пакараньня, з аўтапарку так і не прыйшоў.

Уладзімер Арлоў дэманструе кнігу «Імёны Свабоды».
Папрысутнічаць на акцыю пад'ехаў Стэфан Эрыксан.
З-за таго што арганізатарам акцыі не далі правесьці акцыю у трамваі і аўтобусе, яны вымушаныя былі правесьці яе на месцы збору ля чыгуначнага вакзалу.
Удзельнікі акцыі прэзэнтуюць гасьцям акцыі торт з нагоды Дня правоў чалавека.
І разам задуваюць сьвечкі.
Першаму адрэзаць кавалак далі Стэфану Эрыксану.

Паказаць камэнтары

XS
SM
MD
LG