Лінкі ўнівэрсальнага доступу

У каго ёсьць схільнасьць да раку?


Цяпер у Беларусі можна зрабіць аналіз спадчыннай схільнасьці да ўзьнікненьня раку. Пра гэта паведаміла намесьнік дырэктара па арганізацыйна-мэтадычнай працы Рэспубліканскага навукова-практычнага цэнтру анкалёгіі і мэдыцынскай радыялёгіі імя Аляксандрава Натальля Антоненкава 7 сьнежня на прэс-канфэрэнцыі

Паводле яе слоў, спадчынныя формы складаюць прыкладна 5-7% усіх выпадкаў злаякасных новаўтварэньняў. Каля 1% насельніцтва плянэты маюць спадчынную схільнасьць да разьвіцьця анкалягічных захворваньняў. Значыць, у Беларусі пражывае каля 100 тыс. чалавек з падвышанай рызыкай захварэць на рак з-за спадчынных фактараў, — робіць выснову БелаПАН.

Як адзначыла Антоненкава, мэтад выяўленьня спадчыннай схільнасьці да разьвіцьця раку шырока выкарыстоўваецца за мяжой. Там таксама практыкуецца прафіляктычнае выдаленьне так званых органаў-мішэняў у асобаў з павышанай рызыкай разьвіцьця раку.

Выявіць усіх людзей, якія маюць спадчынную схільнасьць да злаякасных пухлін, нерэальна. Аднак усе ахвотныя могуць прайсьці адмысловы аналіз і вызначыць, ці ёсьць у іх павышаная рызыка разьвіцьця пухліны.

Дасьледаваньне робіцца на падставе інфармацыі пра сваякоў пацыента, калі яны перанесьлі анкалягічныя захворваньні, і малекулярна-генэтычнага аналізу крыві. Абсьледуюцца гены-супрэсары, якія адказваюць за тое, каб у арганізьме не разьвілася пухліна. Калі ў іх выяўляюцца мутацыі, чалавек мае спадчынную схільнасьць да анкалёгіі. Пры захаваньні пэўных умоў жыцьця і працы ён можа сам не захварэць, але перадаць гэтую схільнасьць нашчадкам. За пацыентамі з падвышанай рызыкай разьвіцьця анкалёгіі арганізуецца спэцыяльнае назіраньне ў адпаведнасьці з распрацаванымі на базе цэнтру клінічнымі пратаколамі.

Паводле Антоненкавай, усе, хто жадае высьветліць, ёсьць у іх генэтычная схільнасьць да разьвіцьця раку ці не, могуць зьвяртацца да спэцыялістаў празь менскі тэлефон (017) 265-38-60. Будзе аналіз платны ці бясплатны, мэдыкі вырашаць у залежнасьці ад вынікаў анкетаваньня — колькасьці хворых на анкалёгію сваякоў, ступені сваяцтва, характару паражэньняў, узросту дасьледаванага.
XS
SM
MD
LG