Лінкі ўнівэрсальнага доступу

Заснавальнікам БХД пагражаюць звальненьнем і высяленьнем


Заснавальнікі Беларускай хрысьціянскай дэмакратыі адчуваюць на сабе ціск з боку ўладаў. Пра гэта паведамілі “Свабодзе” сябры аргкамітэту дзеля стварэньня БХД. Гэта другая хваля ціску на людзей, якія паставілі свае подпісы ў дакумэнтах на рэгістрацыю партыі. Людзям, каб прымусіць іх адмовіцца ад подпісу, пагражаюць звальненьнем і нават высяленьнем з жытла.

Сустаршыні аргкамітэту дзеля стварэньня БХД заяўляюць пра ціск на заснавальнікаў партыі.

Гаворыць сустаршыня аргкамітэту БХД Віталь Рымашэўскі:

“Калі параўнаць сытуацыю пасьля першага зьезду і цяперашнюю, то гэтым разам улады дзейнічаюць больш арганізавана. Задзейнічаныя амаль усе выканкамы, задзейнічаныя, я думаю, усе спэцслужбы, таму што масава выклікаюць людзей на працы. Іх непасрэднае начальства прымушае іх адмовіцца ад подпісу заснавальніка партыі.

Магу канстатаваць мужнасьць і гераізм гэтых людзей. Мы маем толькі адну адмову ад подпісу. Гэта наша сяброўка з Гародні. Мы вельмі добра разумеем гэтую жанчыну. Ёй пагражалі звальненьнем і нават больш страшнымі рэчамі. Для яе праца ёсьць вельмі важнай. Ціск адбываецца па ўсёй краіне. У адным з аграгарадкоў Менскага раёну заснавальніцы партыі пагражаюць высяленьнем з дому, які выдалі ўсёй сям’і”.
Магу канстатаваць мужнасьць і гераізм гэтых людзей. Мы маем толькі адну адмову ад подпісу.

Нагадаем: 28 лютага адбыўся першы ўстаноўчы зьезд БХД. Праз два тыдні пасьля таго, як дакумэнты трапілі ў Мін’юст, заснавальнікаў партыі пачалі выклікаць на размовы і прымушаць адклікаць свой подпіс. У траўні заснавальнікам адмовілі ў рэгістрацыі партыі, спаслаўшыся на тое, што ў сьпісе заснавальнікаў адбыліся зьмены.

31 кастрычніка адбыўся другі ўстаноўчы зьезд БХД. Тыдзень таму сустаршыні аргкамітэту перадалі дакумэнты ў Мін’юст. Пры гэтым яны падалі заяву ў пракуратуру пра тое, што заснавальнікі партыі ўжо адчулі ціск з боку ўладаў.

Юрыст арганізацыі Мікола Арцюхоў паведаміў “Свабодзе”:

“Вось сёньняшні прыклад. Надзя Батура зьвярнулася да мяне, каб я папрысутнічаў на размове. Яе выклікаў да сябе начальнік наконт яе подпісу ў сьпісе заснавальнікаў. Начальнік спачатку пытаўся, на якой падставе будзе яе прадстаўнік, але дазволіў мне прысутнічаць.
Як звычайна ставіцца выбар? Ці праца, ці заснавальніцтва.

Я папярэдзіў, што буду карыстацца дыктафонам. Начальнік спытаў Надзею, ці сьвядома яна ставіла свой подпіс і ці разумее яна сутнасьць палітыкі партыі і накірунак яе дзейнасьці. Я папрасіў не задаваць ёй пытаньні наконт асабістага жыцьця і не перавышаць службовыя паўнамоцтвы. Начальнік сказаў на разьвітаньне, што пакуль ня ставіць пытаньне наконт далейшай працы Надзеі”.

Мікола Арцюхоў размаўляў з заснавальнікамі партыі. Ён называе тыповую схему, калі кіраўнік сам-насам з падначаленым вядзе гутарку.

“Як звычайна ставіцца выбар? Ці праца, ці заснавальніцтва. Ты адклікаеш подпіс — і мы да цябе нічога ня маем, альбо мы створым для цябе такія ўмовы, што ты ці сама звольнісься, ці мы цябе звольнім пры першай жа магчымасьці. Натуральна, што ў чалавека стрэс і, можа, нават паніка”.

Пакуль афіцыйнага адказу з боку праваахоўных органаў на заяву сустаршыняў БХД не было. Пракуратура пераслала заяву ў Мін’юст. Паводле закону аб зваротах грамадзян, адказ павінен быць не пазьней як празь месяц ад моманту атрыманьня заявы.
XS
SM
MD
LG