Лінкі ўнівэрсальнага доступу

Старога кварталу Каралін у Пінску ня будзе


У цэнтральнай частцы гораду зьнікне цэлы квартал гарадзкой забудовы канца XIX — пачатку XX стагодзьдзя, паведамляе газэта “Вечерний Брест”.

Група пінчукоў накіравала ў Міністэрства культуры ліст, у якім прасіла абараніць ад разбурэньня квартал жылой забудовы, які зьяўляецца часткай габрэйскага прадмесьця Каралін і пакінуў значны сьлед у гісторыі Пінска.

Аднак Беларуская рэспубліканская навукова-мэтадычная рада пры Міністэрстве культуры прыняла рашэньне: “Лічыць немэтазгодным наданьне статусу гісторыка-культурнай каштоўнасьці кварталу Каралін, абмежаванаму вуліцамі Іркуцка-Пінскай Дывізіі, Насырава, Кулікова, Альхоўскіх у Пінску”.

Краязнаўцы заяўляюць, што страціўшы цэлы квартал адна- і двухпавярховых дамкоў, гістарычнае асяроддзьдзе цэнтральнага раёну гораду несумненна зьбяднее.

Плянуецца, што на месцы зьнесенага жылога квартала зьявіцца студэнцкі гарадок Палескага дзяржуніверсітэту. Межы студгарадка яшчэ некалькі гадоў таму зацьвердзіў прэзыдэнт краіны.
XS
SM
MD
LG