Лінкі ўнівэрсальнага доступу

Карантын, магчыма, працягнуць


Мэдыкі настойваюць на тым, каб вакацыі ў менскіх школах працягнулі да 15 лістапада.


Пра гэта паведаміла загадчыца эпідэміялягічнага аддзелу Мінскага гарадзкога цэнтру гігіены і эпідэміялёгіі Алена Фісенка.

Восеньскія вакацыі павінны былі скончыцца 2 лістапада. Але 31 кастрычніка з прычыны росту захворваньня на ВРВІ і грып улады Менску вырашылі падоўжыць канікулы да 6 лістапада, а затым — па 11 лістапада ўключна, нагадвае БелаПАН.

“Улічваючы, што мы знаходзімся практычна на піку захворваньня на вострыя рэсьпіраторныя вірусныя інфэкцыі і грып, дзецям зараз мэтазгодна заставацца паасобку”, — кажа спадарыня Фісенка.

Яна зазначае, што за апошні тыдзень сытуацыя з захворваньнем на грып і ВРВІ ў Мінску трохі стабілізавалася. “Калі гэтая тэндэнцыя захаваецца, то можна разьлічваць, што на гэтым тыдні колькасьць хворых пачне зьніжацца”.

За апошні тыдзень на ВРВІ і грып захварэлі каля 65 тысяч жыхароў Менску.

9 лістапада было пастаўлена 12 175 такіх дыягназаў. У 34% хворых пацьверджаны грып. Сярод хворых на грып за апошні тыдзень 68% складаюць дарослыя.

“Мы можам меркаваць, што большасьць выпадкаў грыпу — гэта менавіта выпадкі так званага сьвінога грыпу, новага вірусу A (H1N1). Статыстыка пацьверджаных выпадкаў — іншая, але гэта не характарызуе сытуацыю”, — заяўляе лекарка.

Галоўны спэцыяліст упраўленьня ідэалягічнай, сацыяльнай і выхаваўчай працы камітэту адукацыі Мінгарвыканкаму Надзея Вялікая паведаміла, што рашэньня падоўжыць вакацыі для мінскіх школьнікаў трэцім разам пакуль не прынялі, аднак гэтае пытаньне абмяркоўваецца.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG